சீனாவில் விவாகரத்தால் சொத்து பங்கீட்டின்போது ஏற்பட்ட திருப்தியின்மை காரணமாக மன அழுத்ததில் இருந்த நபர் ஓட்டிச்சென்ற கார் விளையாட்டு அரங்கம் அருகே நின்று உடற்பயிற்சி செய்துகொண்டிருந்தவர்கள் மீது மோதிய சம்பவத்தில் 35 பேர் உடல்நசுங்கி உயிரிழந்தனர்.
சீனாவின் கவ்ங்டங் மாகாணம் குஹாய் நகரில் விளையாட்டு அரங்கம் உள்ளது. இந்த விளையாட்டு அரங்கத்திற்கு வெளியே அந்நாட்டு நேரப்படி இன்று மாலை 7.30 மணியளவில் 70க்கும் மேற்பட்டோர் உடற்பயிற்சி செய்து கொண்டிருந்தனர்.
அப்போது, அந்த விளையாட்டு அரங்கம் அருகே வேகமாக வந்த கார் அங்கு உடற்பயிற்சி செய்து கொண்டிருந்தவர்கள் மீது கார் அதி வேகமாக மோதியது.
இந்த சம்பவத்தில் பெண்கள், குழந்தைகள் உள்பட 35 பேர் உடல்நசுங்கி சம்பவ இடத்திலேயே உயிரிழந்தனர். மேலும் இந்த விபத்தில், 43 பேர் படுகாயமடைந்தனர்.
இந்த விபத்து குறித்த தகவலறிந்து விரைந்து அங்கு சென்ற போலீசார், படுகாயமடைந்தவர்களை மீட்டு அருகில் உள்ள மருத்துவமனையில் சிகிச்சைக்கு அனுமதித்தனர்.
பின்னர், விபத்தை ஏற்படுத்திய காரை ஓட்டிச்சென்ற 62 வயதான பென் என்ற நபரையும் போலீசார் கைது செய்தனர்.
கைது செய்யப்பட்ட நபர் தற்போது கோமா நிலையில் உள்ளதாகவும் அவருக்கு மருத்துவமனையில் சிகிச்சை அளிக்கப்பட்டு வருவதாகவும் காவல் துறையினர் தெரிவித்துள்ளனர்.
விவாகரத்தால் சொத்து பங்கீட்டின் போது ஏற்பட்ட திருப்தியின்மை காரணமாக பென் என்ற நபர் தனது காரை உடற்பயிற்சி செய்து கொண்டிருந்தவர்கள் மீது மோதி விபத்தை ஏற்படுத்தியதாக முதற்கட்ட தகவல் வெளியாகியுள்ளது.
மேலும், நாளை சீன விமானப்படை சார்பில் பிரமாண்ட விமான சாகச நிகழ்ச்சி குஹாய் நகரில் நடைபெற உள்ள நிலையில் இச்சம்பவம் அந்நகரில் பெரும் பரபரப்பை ஏற்படுத்தியுள்ளது.