தமிழ் சினிமா ரசிகர்களின் அமோக ஆதரவை பெற்ற மாமன்னன் திரைப்படம் தற்போது ஓடிடி தளத்திலும் புதிய சாதனை படைத்து அசத்தியுள்ளது .
தமிழ் சினிமா கண்டெடுத்த பல முத்தான இயக்குநர்களில் ஒருவராக வலம் வருபவர் மாரி செல்வராஜ் . படிப்பறிவு , நாகரிக வளர்ச்சி அடைந்த 2023 ஆம் ஆண்டிலும் தீண்டாமை என்னும் கொடுமைகள் அரங்கேறும் சூழலில் இன்றைய தலைமுறைகளுக்கு சமூக நீதி குறித்த விழிப்புணர்வை படத்திற்கு படம் புகுத்தி எல்லோருக்கும் எல்லா உரிமையும் கிடைக்கவேண்டும் என்பதை தனது எழுத்தின் மூலம் படமாக எடுத்துக்காட்டி வருகிறார் .
அந்தவகையில் தீண்டாமையை மையமாக கொண்டு மாரி செல்வராஜின் இயக்கத்தில் உதயநிதி ஸ்டாலின் கதையின் நாயகனாக நடித்துள்ள படம் மாமன்னன்.
இசைப்புயல் ஏ.ஆர்.ரகுமான் இசையமைத்துள்ள இந்த படத்தில் உதயநிதிக்கு ஜோடியாக நவரச நாயகி கீர்த்தி சுரேஷ் நடித்துள்ளார். இவர்களுடன் வைகை புயல் வடிவேலு, பகத் பாசில் உள்ளிட்ட பல முன்னணி நட்சத்திரங்கள் முக்கிய கதாபாத்திரத்தில் நடித்துள்ளனர்.
விளையாட்டு மற்றும் இளைஞர்நலத்துறை அமைச்சராக இருக்கும் உதயநிதி ஸ்டாலினின் கடைசி படம் என்பதால் ரசிகர்களின் மிக பெரிய எதிர்பார்க்கிடையே கடந்த மாதம் 29ம் தேதி பக்ரீத் பண்டிகை அன்று திரையரங்குகளில் கோலாகலமாக வெளியான இப்படம் வசூல் ரீதியாகவும் விமர்சன ரீதியாகவும் மாபெரும் வெற்றி படமாக உருவெடுத்துள்ளது.
திரையரங்குகளில் வெற்றிநடைப் போட்ட இப்படம் நெட்பிளிக்ஸ் ஓடிடி தளத்தில் தற்போது வெற்றிகரமாக ஓடிக்கொண்டிருக்கிறது .
திரையரங்குகளில் மாமன்னன் படத்திற்கு ரசிகர்களிடம் இருந்து கிடைத்த அமோக வரவேற்பு துளியளவும் குறையாமல் ஓடிடி தளத்திலும் கிடைத்து வருகிறது .
ரசிகர்களின் அமோக ஆதரவால் பிரபல ஓடிடி தளமான நெட்பிளிக்ஸிலும் தொடர்ந்து 3 நாட்களாக ட்ரெண்டிங் நம்பர் 1ல் மாமன்னன் இடம்பிடித்துள்ளது . இந்த மகிழ்ச்சியான செய்தியை புகைப்படத்துடன் இயக்குநர் மாரிசெல்வராஜ் தனது சமூகவலைதள பக்கத்தில் பகிர்ந்து பெருமிதத்துடன் தெரிவித்துள்ளார் .