சென்னையில் இன்று (17.11.23) 13-வது தேசிய ஆடவர் ஹாக்கி சாம்பியன்ஷிப் தொடங்கி வரும் 28-ம் தேதி வரை நடைபெற உள்ளது.
இந்தத் தொடரின் அனைத்து ஆட்டங்களும் சென்னை எழும்பூரில் உள்ள மேயர் ராதாகிருஷ்ணன் ஹாக்கிமைதானத்தில் நடை பெறுகிறது. இதில், மொத்தம் 28 அணிகள் 8 பிரிவுகளாக பிரிக்கப்பட்டு கலந்து கொண்டு பட்டம் வெல்ல மோதுகின்றன. அதன்படி,
‘A’ பிரிவில் சத்தீஸ்கர், குஜராத், நடப்பு சாம்பியன் ஹரியாணா ஆகிய அணிகள் இடம் பெற்றுள்ளன.
‘B’ பிரிவில் தமிழ்நாடு, இமாச்சல் பிரதேசம், அசாம் அணிகளும்,
‘C’ பிரிவில் கர்நாடகா, பீகார், தாத்ரா & நகர் ஹவேலி மற்றும் டாமன் & டையூ அணிகளும்,
‘D’ பிரிவில் மகாராஷ்டிரா, பஞ்சாப், உத்தராகண்ட் அணிகளும்
‘E’ பிரிவில் பெங்கால், மத்தியப் பிரதேசம், ஜம்மு & காஷ்மீர், மணிப்பூர் ஆகிய அணிகளும்,
‘F’ பிரிவில் ஜார்கண்ட், சண்டி கர், ஆந்திரா, கோவா அணிகளும்,
‘G’ பிரிவில் உத்தரப்பிரதேசம், புதுச்சேரி, கேரளா, ராஜஸ்தான் அணிகளும்,
‘H’ பிரிவில் டெல்லி, ஒடிசா, தெலங்கானா, அருணாச்சல பிரதேசம் ஆகிய அணிகளும் இடம் பெற்றுள்ளன.
இவற்றில் 25-ம் தேதி நடைபெறும் கால் இறுதி சுற்றுக்கு ஒவ்வொரு பிரிவிலும் முதலிடம் பிடிக்கும் அணிகள் முன்னேறும். தொடர்ந்து 27-ம் தேதி அரை இறுதி ஆட்டங்களும், 28-ம் தேதி இறுதிப் போட்டியும் நடைபெற உள்ளது. இந்தத் தொடரில் இந்திய ஆடவர் ஹாக்கி அணியில் இடம் பெற்றுள்ள அனைத்து வீரர்களும் பல்வேறு அணிகளுக்காக களமிறங்குகின்றனர்.
இந்நிலையில், தொடக்க நாளான இன்று தமிழக அணி தனது முதல் ஆட்டத்தில் அசாம் அணியை எதிர்கொள்கிறது என்றும், மற்ற ஆட்டங்களில் மத்திய பிரதேசம் – மணிப்பூர், மகாராஷ்டிரா – உத்தராகண்ட் ஆகிய அணிகள் மோதுகின்றன என தமிழக ஹாக்கி சங்கத் தலைவர் சேகர் ஜே.மனோகரன் தெரிவித்துள்ளார்.