வடகொரியாவில் வெள்ளம் மற்றும் நிலச்சரிவுகளில் சிக்கி 1000 பேர் உயிரிழந்துள்ள நிலையில், கடமை தவறிய அரசு அதிகாரிகளாக 30 பேர் கண்டறியப்பட்டு அதிபர் கிம் ஜாங் உன் உத்தரவுப்படி அவர்களுக்கு மரண தண்டனை நிறைவேற்றப்பட்டுள்ளதாகத் தகவல்கள் வெளியாகியுள்ளன.
கடந்த ஜூலை மாதம் வடகொரியாவில் ஏற்பட்ட வெள்ளம் மற்றும் நிலச்சரிவுகளில் 4,100 வீடுகள், 7,410 விவசாய நிலங்கள், அரசு கட்டடங்கள், சாலைகள் மற்றும் ரெயில்வே லைன்கள் என அனைத்தும் வெள்ளத்தில் மூழ்கின.
இந்த பாதிப்புகளில் சிக்கி சுமார் 1000 பேர் உயிரிழந்துள்ளதாகக் கூறப்படுகிறது. நிலச்சரிவு மற்றும் வெள்ளதால் வடகொரியாவின் வடமேற்கு பகுதிகளில் உள்ள நகரங்களின் அதிக பாதிப்புகள் நிகழ்ந்துள்ளன.
இந்நிலையில், வெள்ளம் பாதித்த பகுதிகளை நேரில் சென்று பார்வையிட்ட அதிபர் கிம் ஜாங் உன் அவற்றை மீண்டும் கட்டியெழுப்ப பல மாதங்கள் ஆகும் என்று தெரிவித்துள்ளார்.
மேலும், வெள்ளம் பாதித்த பகுதிகளில் இருந்து மீட்கப்பட்ட 15,400 பேருக்கு தலைநகர் பியோங்யாங்கில் அரசாங்கம் தற்காலிக தங்குமிடம் வழங்கியுள்ளது.
அதனைத் தொடர்ந்து இந்த அசம்பாவிதத்தை தடுக்கத் தவறிய அதிகாரிகளைக் கண்டறிந்து கடுமையான நடவடிக்கை எடுக்க வேண்டும் என்று அதிபர் கிம் உத்தரவிட்டிருந்தார்.
இந்நிலையில், அதிபர் கிம் ஜாங் உன் உத்தரவுப்படி கடந்த மாத இறுதியில் ஊழல் மற்றும் கடமை தவறிய அரசு அதிகாரிகளாக 30 பேர் கண்டறியப்பட்டு அவர்களுக்கு மரண தண்டனை நிறைவேற்றப்பட்டுள்ளதாகத் தகவல்கள் வெளியாகி உள்ளது.
இது தொடர்பான செய்திகளை தென்கொரியாவின் ஊடகங்கள் வெளியிட்டு வரும் நிலையில், வடகொரியா தரப்பில் இருந்து எதுவும் கூறப்படவில்லை.
