“சச்சின், நீரவ் உட்பட மொத்தம் 380 பேர்”.. உலக பினாமி சொத்துக்குவிப்பு – உலுக்கும் பண்டோரா ரிப்போர்ட்..!

Spread the love

பினாமி சொத்து குவிப்பில் ஈடுபட்ட இந்திய கிரிக்கெட் ஜாம்பவான் சச்சின் டெண்டுல்கர் உள்பட 380 இந்தியர்களின் பெயர்களை பண்டோரா ஆவணங்கள் வெளியிட்டு நாடு முழுவதும் பெரும் பரபரப்பை எற்படுத்தியுள்ளது.

ICIJ எனப்படும் பன்னாட்டுப் புலனாய்வுப் பத்திரிகையாளர்கள் கூட்டமைப்பு (International Consortium of Investigative Journalists – ICIJ) இந்தப் பட்டியலை வெளியிட்டுள்ளது.

2015ஆம் ஆண்டு பனாமா ஆவணங்கள் (Panama Papers) வெளியாகி உலகளவில் பரபரப்பை ஏற்படுத்திய நிலையில், தற்போது பண்டோரா ஆவணங்கள் (Pandora Papers) வெளியாகியுள்ளது.

நிதி சேவை வழங்கும் 14 நிறுவனங்களிலிருந்து கசிந்த 1.19 கோடி ஆவணங்களை 600-க்கும் மேற்பட்ட ஊடகவியலாளர்கள் பகுப்பாய்வு செய்து இந்தப் பட்டியலை வெளியிட்டுள்ளனர்.

அக்டோபர் 3ஆம் தேதி வெளியிடப்பட்ட இந்தப் பண்டோரா ஆவணங்களில், உலகத் தலைவர்களின் அறியப்படாத பண மோசடிகள், சட்டவிரோத பரிவர்த்தனைகள், வெளிநாடுகளில் பினாமி சொத்துகள் ஆகியவை குறித்தான அதிர்ச்சியூட்டும் ஆவணங்கள் அடங்கியுள்ள தொகுப்புகள் உள்ளன.

இந்த பண்டோரா அறிக்கையில் 91 நாடுகளைச் சேர்ந்த 330-க்கும் மேற்பட்ட அரசியல்வாதிகளும் இடம்பெற்றுள்ளனர்.

குறிப்பாக வங்கி மோசடி வழக்கில் இந்தியாவிலிருந்து தப்பியோடி வைர வியாபாரி நீரவ் மோடி சகோதரி, பாகிஸ்தான் அமைச்சர்கள், ஜோர்டான் மன்னர் அப்துல்லா, பிரிட்டன் முன்னாள் பிரதமர் டோனி பிளேர் மற்றும் அவரது மனைவி ஷெரி பிளேர்,

ரஷ்ய அதிபர் விளாடிமிர் புடின், செக் குடியரசு பிரதமர் ஆண்ட்ரேஸ் பாபிஸ், கென்யா அதிபர் உஹுரு, பாப் இசை பாடகி ஷகிரா, இந்திய கிரிக்கெட் ஜாம்பவான் சச்சின் டெண்டுல்கர் உள்ளிட்டோர் நிதி முறைகேட்டில் ஈடுபட்டுள்ளதாக இந்த ஆவணங்களில் கூறப்பட்டுள்ளது.

இதில் குறிப்பாக இந்தியாவிலிருந்து மட்டும் 380 பிரபலங்களும், பாகிஸ்தானிலிருந்து 700 பிரபலங்களும் இந்த மோசடிப் பட்டியில் உள்ளதாக ஆவண தரவுகள் தெரிவிக்கின்றன.

கடந்த 2016ஆம் ஆண்டு பனாமா நாட்டைச் சேர்ந்த மொசாக் ஃபென்செக்கா என்ற சட்ட நிறுவனத்தின் ரகசிய ஆவணங்களை ஜெர்மனியைச் சேர்ந்த ஊடகம் ஒன்று வெளியிட்டது.

தற்போது பண்டோரா ஆவணங்களை வெளியிட்டுள்ள இதே பன்னாட்டுப் புலனாய்வுப் பத்திரிகையாளர்கள் கூட்டமைப்பு தான் இதை புலனாய்வு செய்து பட்டியலாக வெளியிட்டது.

இந்த பட்டியலில் இந்திய திரைப்பட நட்சத்திரங்கள் ஐஸ்வர்யா ராய், அமிதாப் பச்சன், டிஎல்ஃப் நிறுவன தலைவர் கேபி சிங், அவருடைய ஒன்பது குடும்ப உறுப்பினர்கள் மற்றும் கவுதம் அதானியின் மூத்த சகோதரர் வினோத் அதானி ஆகியோரின் பெயர்கள் இடம் பெற்றிருந்தது குறிப்பிடத்தக்கது.

இந்த பனாமா ஆவணங்கள் வெளியான மூன்று மாதங்களில் விர்ஜின் தீவுகளில் உள்ள தனது நிறுவனத்தைக் கலைக்கும்படி இந்திய கிரிக்கெட் அணியின் முன்னாள் கேப்டன் சச்சின் டெண்டுல்கர் கேட்டுக்கொண்டதாகவும் தற்போது வெளியாகியுள்ள பண்டோரா ஆவணங்களில் கூறப்பட்டுள்ளது.

தற்போது வெளியாகியுள்ள பண்டோரா ஆவணங்களில் கூறப்பட்டுள்ள பிரபலங்கள் அனைவரும் குற்றம் செய்தவர்கள் என்பது நிரூபணமாகவில்லை.

வெளியாகியிருக்கும் ஆவணங்களைக் கொண்டு, எடுக்கப்படும் அடுத்தக்கட்ட சட்டரீதியிலான நடவடிக்கைகளை பொறுத்தே அவர்கள் வெளிநாடுகளில் சட்டவிரோத பணமோசடியில் ஈடுபட்டனரா என்பது தெரியவரும்.


Spread the love
Related Posts