கேரள மாநிலம் காசர்கோடு உப்பளம் பகுதியில் ஏ.டி.எம். மையத்தில் பணம் நிரப்ப (ATM) நின்ற வாகனத்தை உடைத்து மர்மநபர்கள் ரூ.50 லட்சத்தை கொளையடித்து உள்ளனர்.
காசர்கோடு உப்பளம் பகுதியில் செயல்படும் தனியார் வங்கியின் ஏ.டி.எம். மையத்தில் தனியார் ஏஜென்சி மூலமாக பணம் நிரப்பப்படுகிறது. புதன்கிழமை பிற்பகல், இந்த ஏடிஎம் மையத்துக்கு பணம் நிரப்புவதற்காக வாகனம் ஒன்றில் தலா 50 லட்சம் வீதம் இரண்டு மூட்டைகளில் ரூ.1கோடி பணத்துடன் வந்துள்ளனர்.
அதில் ரூ.20 லட்சம் பணத்தை மட்டும் ஏடிஎம்மில் நிரப்புவதற்காக ஊழியர்கள் எடுத்துச் சென்றுள்ளனர். வாகனத்தின் கதவு பூட்டப்பட்டிருந்ததால் பாதுகாப்புக்கு அங்கு ஆள் யாருமில்லை என்று கூறப்படுகிறது.
இந்த நிலையில் ஏ.டி.எம்மில் பணம் நிரப்பிவிட்டு வாகனத்துக்கு வந்தபோது வாகனத்தின் பக்கவாட்டு கண்ணாடி உடைக்கப்பட்டு, உள்ளே வைக்கப்பட்டிருந்த 50 லட்சம் ரூபாயை மர்மநபர்கள் திருடிச் சென்றிருப்பதை அறிந்தனர்.
இதையடுத்து பட்டப்பகலில் அரங்கேறிய இந்த துணிகர கொள்ளைச் சம்பவம் குறித்து மஞ்சேஷ்வர் காவல்நிலையத்துக்கு தனியார் ஏஜென்ஸி ஊழியர்கள் அளித்த தகவலைத் தொடர்ந்து போலீசார் அங்கு மோப்பநாய் மற்றும் தடயவியல் நிபுணர்களோடு விரைந்து வந்து விசாரித்தனர்.
தடயவியல் நிபுணர்கள் தடயங்களை சேகரித்தனர். மோப்பநாய் அங்கிருந்து சில மீட்டர் தூரம் சென்றுவிட்டு திரும்பிவந்தது. யாரையும் கவ்விப் பிடிக்கவில்லை.
இதனைத் தொடர்ந்து சம்பவம் குறித்து வழக்குபதிவு செய்த போலீசார், திருட்டு நடந்த வாகனத்தை காவல்நிலையத்துக்கு எடுத்து சென்றனர் . அதில் இருந்த பணத்தை மற்றொரு வாகனத்தில் அனுப்பி வைத்தனர்.
Also Read : https://itamiltv.com/law-and-order-damage-in-dmk-regime-edappadi-palaniswami-angry-speech/
சம்பவ இடத்தில் சாலைப் பணி காரணமாக அங்கிருந்த சிசிடிவிக்கள் இணைப்பு துண்டிக்கப்பட்டிருந்தால் அவை இயங்கவில்லை. இதனால் மர்மநபர்களை கண்டறிவதில், சிக்கல் நீடிக்கிறது. மேலும் பணம் இருந்த வாகனத்தின் அருகே பாதுகாவலரை நிறுத்தாதது ஏன்?
வாகனத்தின் கண்ணாடியை உடைத்தபோது கூட சப்தம் கேட்கவில்லையா? (ATM) என்பது உள்ளிட்ட சந்தேகங்களையும் தனியார் ஏஜென்சி ஊழியர்களிடம் போலீசார் விசாரணையாக்கி வருகின்றனர்.
பட்டப்பகலில் நடந்த இந்த பகீர் கொள்ளை சம்பவம் காசர்கோட்டில் பரபரப்பை ஏற்படுத்தி உள்ளது.