தமிழகத்தில் 2026 சட்டமன்ற தேர்தலுக்கான வாக்குப்பதிவு ஏப்ரல் 23ஆம் தேதி முடிவடைந்துள்ளது. இத்தேர்தலின் முடிவுகள் மே 4ஆம் தேதி திங்கட்கிழமை வெளியாக உள்ளது.
வழக்கமான தேர்தல்களைக் காட்டிலும் இந்த முறை தேர்தல் மீது மக்கள் அதிக கவனம் செலுத்தியுள்ளனர்.
முக்கிய காரணமாக நடிகர் விஜய் மற்றும் அவரது புதிய அரசியல் கட்சி தமிழக வெற்றிக் கழகம் (TVK) முதல் முறையாக தேர்தல் களத்தில் இறங்கியது குறிப்பிடப்படுகிறது.
இளைஞர்கள் அதிக அளவில் வாக்களித்ததும் இந்த தேர்தலின் சிறப்பாக பார்க்கப்படுகிறது. மேலும் 85% வரை வாக்குப்பதிவு பதிவானதற்கு எஸ்ஐஆர் (SIR) நடைமுறையும் ஒரு காரணமாக இருந்ததாக கூறப்படுகிறது.
அதேசமயம் விஜய்யின் அரசியல் வருகையும் வாக்குப்பதிவை அதிகரித்ததாக அரசியல் வட்டாரங்கள் கூறுகின்றன.
விஜய் பெரம்பூர் மற்றும் திருச்சி கிழக்கு ஆகிய இரண்டு தொகுதிகளில் போட்டியிட்டுள்ளார். அவரைச் சுற்றி பெரிய எதிர்பார்ப்பு இருந்தாலும், அவர் வெற்றி பெறுவது கடினம் என்றும், பல தொகுதிகளில் தவெக டெபாசிட் இழக்கும் வாய்ப்பு அதிகம் என்றும் மூத்த பத்திரிகையாளர் தராசு ஷியாம் தெரிவித்துள்ளார். தேர்தல் விதிகளின்படி ஒரு கட்சி டெபாசிட் பெற 16.6% வாக்குகள் பெற வேண்டும். ஆனால் விஜய்யின் வாக்கு வங்கி 8% முதல் 12% மட்டுமே இருக்கும் என அவர் கணித்துள்ளார்.
திமுகவின் வாக்கு வங்கி திராவிட சிந்தனை, சமூக நீதி திட்டங்கள் மற்றும் நலத்திட்டங்களால் உறுதியாக இருப்பதால் அதை உடைப்பது விஜய்க்கு கடினம் எனவும் கூறப்படுகிறது. புதிய வாக்காளர்கள் விஜயை மாற்று சக்தியாக பார்க்கலாம் என்றாலும், நலத்திட்டங்களால் பயன் பெற்றவர்கள் ஆளும் கட்சிக்கே ஆதரவு தர வாய்ப்பு அதிகம் எனவும் கூறப்படுகிறது.
மேலும் திமுக, அதிமுக போன்ற கட்சிகளுடன் ஒப்பிடும்போது தவெகவுக்கு அனுபவமுள்ள பூத் மேலாண்மை மற்றும் தொண்டர் அமைப்பு குறைவாக இருப்பது பெரிய பலவீனமாக பார்க்கப்படுகிறது.
சென்னையில் வாக்குப்பதிவு அதிகரித்ததாக தெரிந்தாலும், பல வாக்குகள் மாவட்டங்களுக்கு சிதறியதால் எந்த தொகுதியிலும் பெரிய பலன் கிடைக்காது என்றும் விமர்சனம் முன்வைக்கப்பட்டுள்ளது.
இறுதியில், இந்த கணிப்புகள் உண்மையா அல்லது விஜய் அரசியலில் புதிய மாற்றத்தை உருவாக்குவாரா என்பது தேர்தல் முடிவுகளிலேயே தெரியவரும்.
