தமிழ்நாடு முதலமைச்சர் விஜய் நேற்று புதுடெல்லியில் பிரதமர் நரேந்திர மோடியை சந்தித்து பல முக்கிய கோரிக்கைகளை முன்வைத்தார். தமிழ்த்தாய் வாழ்த்து பாடல், மேகதாது அணை விவகாரம், வான்வழி அமைப்பு மையம் மற்றும் இலங்கை சிறையில் உள்ள தமிழக மீனவர்கள் தொடர்பான பிரச்சனைகள் குறித்து அவர் வலியுறுத்தியதாக கூறப்படுகிறது.
ஆனால், மத்திய அரசின் ஆதரவுடன் செயல்படுத்தப்படும் PM SHRI பள்ளிகள் திட்டம் குறித்து தமிழக அரசு எந்தக் கோரிக்கையும் முன்வைக்காதது குறித்து அரசியல் தலைவர்களும் கல்வியாளர்களும் கேள்வி எழுப்பி வருகின்றனர்.
2022-ல் அறிமுகப்படுத்தப்பட்ட PM SHRI திட்டம், நாடு முழுவதும் உள்ள அரசுப் பள்ளிகளை தேசிய கல்விக் கொள்கை (NEP 2020) அடிப்படையில் மாதிரிப் பள்ளிகளாக மாற்றுவதை நோக்கமாகக் கொண்டது. மாணவர்களுக்கு நவீன கல்வி, டிஜிட்டல் வசதிகள் மற்றும் திறன் மேம்பாட்டு வாய்ப்புகளை வழங்குவதே இதன் முக்கிய நோக்கமாகும்.
ஆனால், இந்த திட்டத்தில் இடம்பெறும் மும்மொழிக் கொள்கை தமிழக அரசின் இருமொழிக் கொள்கைக்கு முரணாக இருப்பதாக மாநில அரசு தொடர்ந்து எதிர்ப்பு தெரிவித்து வருகிறது. மறைமுகமாக இந்தித் திணிப்பு நடைபெறும் என்ற அச்சமும் அரசியல் கட்சிகள் மத்தியில் உள்ளது.
இதன் காரணமாக, சமக்ர சிக்ஷா திட்டத்தின் கீழ் தமிழகத்திற்கு வழங்கப்பட வேண்டிய ரூ.3,500 கோடி நிதியை மத்திய அரசு நிறுத்தி வைத்துள்ளதாக கூறப்படுகிறது. இது கல்வித் திட்டங்கள் மற்றும் மாணவர்களின் நலனில் பாதிப்பை ஏற்படுத்தும் என கல்வியாளர்கள் கவலை தெரிவிக்கின்றனர்.
தற்போதைய தமிழக வெற்றிக் கழக அரசும், முந்தைய அரசின் இருமொழிக் கொள்கையையே தொடரும் நிலைப்பாட்டில் உள்ளது. இருப்பினும், மத்திய மற்றும் மாநில அரசுகள் நேரடியாக பேச்சுவார்த்தை நடத்தி, மாணவர்களின் நலனை கருத்தில் கொண்டு ஒரு சுமூக தீர்வை காண வேண்டும் என்று கல்வியாளர்கள் வலியுறுத்தி வருகின்றனர்.
