கோத்தகிரி அருகே குஞ்சப்பனை மற்றும் அதன் சுற்றுவட்டார பகுதிகளில் ஏராளமான பலா மரங்கள் உள்ளன. கோடை சீசன் தொடங்க உள்ள நிலையில் இந்த பலா மரங்களில் தற்போது பலா பிஞ்சுகள் காய்க்க தொடங்கி உள்ளன.
சீசன் சமயத்தில் காய்த்து குலுங்கும் பலா பழங்களை உண்பதற்காக சமவெளி பகுதிகளில் இருந்து காட்டு யானைகள் இப்பகுதிக்கு வந்து முகாமிட்டு உள்ளது
இந்த காட்டு யானைகள் அவ்வப்போது சாலையோரங்களில் உள்ள பலா மரங்களில் உள்ள பலா பிஞ்சுகளை உண்பதற்காக கோத்தகிரி மேட்டுப்பாளையம் சாலையில் அடிக்கடி உலா வருவது தொடர்கதையாக உள்ளது.
இந்த நிலையில் நேற்று குஞ்சப்பனை அருகே செம்மனாரை கிராம பகுதியில் காட்டு யானை அங்குள்ள பலா மரத்தில் காய்த்திருந்த பிஞ்சுகளை தனது காலை உயர்த்தி துதிக்கையால் பறித்து சுவைத்தது.
அங்கிருந்த தொழிலாளர்கள் அந்த காட்சியை தங்களது செல்போனில் வீடியோ எடுத்து சமூக வலைதளங்களில் பதிவிட்டனர். அந்த காட்சி தற்போது சமூக வலைத்தளத்தில் வைரலாகி வருகிறது