கருத்து வேறுபாடு காரணமாக பிரிந்து சென்ற மனைவியை, கணவர் கத்தியால் வெட்டிய நிலையில், அதனை தடுக்க வந்த மாமனார், மைத்துனரையும் வெட்டி (slashed) விட்டு தப்பி ஓடிய சம்பவம் அதிர்ச்சியை ஏற்படுத்தியுள்ளது.
சென்னை வியாசர்பாடி இந்திரா காந்தி நகரைச் சேர்ந்தவர் 29 வயதாகும் பரதன் ஆட்டோ டிரைவர். இவருடைய மனைவி தனலட்சுமி(29).
இந்நிலையில், இருவருக்கும் இடையே ஏற்பட்ட கருத்து வேறுபாடு காரணமாக கணவரை விட்டு பிரிந்து சென்ற அவரது மனைவி தனலட்சுமி கடந்த 3 ஆண்டுகளாக கொடுங்கையூர், எருக்கஞ்சேரி, பாப்பாத்தி அம்மன் கோவில் தெருவில் வசிக்கும் அவரது தாய் வீட்டில் வசித்து வந்துள்ளார்.
இதையடுத்து, நேற்று முன்தினம் இரவு பரதன், தனது மாமியார் வீட்டிற்குச் சென்று மனைவியுடன் தகராறு செய்துள்ளார். இந்நிலையில், கணவன்-மனைவி இடையே வாக்குவாதம் முற்றியது.
இதனால், ஆத்திரமடைந்த பரதன், தான் மறைத்து வைத்திருந்த மீன் வெட்டும் கத்தியை எடுத்து மனைவி தனலட்சுமியை வெட்டியுள்ளார்.
அதனைக் கண்டு அதிர்ச்சியையடைந்து தடுக்க வந்த மாமனார் ராஜசேகர் (65) மற்றும் மைத்துனர் அப்புன்ராஜ் (28) ஆகியோரையும் கத்தியால் வெட்டி (slashed) விட்டு அங்கிருந்து பரதன் தப்பி ஓடிவிட்டார்.
இதனையடுத்து, காயமடைந்த 3 பேரும் சிகிச்சைக்காக அரசு ஸ்டான்லி மருத்துவமனையில் சேர்க்கப்பட்டுள்ளனர்.
தொடர்ந்து, இச்சம்பவம் குறித்து காவல் துறையினருக்கு தகவல் அளிக்கப்பட்டதை அடுத்து கொடுங்கையூர் போலீசார் வழக்குப்பதிவு செய்து தப்பி ஓடிய ஆட்டோ டிரைவர் பரத்தை கைது செய்து விசாரணை நடத்தி வருகின்றனர்.