பிரபல சமூக வலைத்தளமான ட்விட்டர் செயலியின் லோகோவை அதன் நிறுவனர் எலான் மஸ்க் திடீரென மாற்றம் செய்துள்ளளார். இது தற்காலிகமானதா அல்லது நிரந்தரமானதா என்பது குறித்து அறிவிக்கப்படவில்லை.
நீண்ட இழுத்தடிப்புக்கு பின் உலகின் முன்னணி பணக்காரர்களில் ஒருவரான எலான் மஸ்க் கடந்தாண்டு அக்டோபரில் ட்விட்டரை 44 பில்லியன் டாலருக்கு விலைக்கு வாங்கினார். அன்று முதல் ட்விட்டரில் பல்வேறு மாற்றங்களை செய்து வரும் எலான் மஸ்க், தற்போது ட்விட்டர் செயலியின் லோகோவை மாற்றி உள்ளார்.
ட்விட்டரின் அடையாளமாக கருதப்படும் நீல பறவை மாற்றப்பட்டு அதற்கு பதிலாக ஜப்பானின் முக்கிய நாய் இனமான ஷிபா இனுவின் லோகோ வைக்கப்பட்டுள்ளது. மேலும் இந்த லோகோ மாற்றம் செல்போன் செயலியில் இடம் பெறவில்லை. மாறாக கணினி உள்ளிட்ட டெஸ்க்டாப் தளத்தில் மட்டுமே காணப்படுகிறது.
இது குறித்து தனது ட்விட்டர் பக்கத்தில் விளக்கமளித்துள்ள எலான் மஸ்க், கடந்த மார்ச் மாதம் ஒரு பயனர் தன்னிடம் ட்விட்டர் லோகோவை ‘Doge’ படமாக மாற்றக் கூறியதாகவும் அந்தப் பயனருக்கு, லோகோவை மாற்றுவதாக தாம் உறுதியளித்ததையும் குறிப்பிட்டார். அதன்படி நீல குருவிக்குப் பதிலாக Dogecoin லோகோவான நாய் படத்தை மாற்றியுள்ளதாக தெரிவித்தார்.
முன்னதாக கடந்த பிப்ரவரி 15 ஆம் தேதி இதே நாயின் புகைப்படத்தை ட்விட்டர் பக்கத்தில் பதிவிட்டு, புதிய CEO என கூறி அனைவரையும் அதிர்ச்சியில் ஆழ்த்தினார். மேலும், இவர் மற்ற நபர்களை விட மிகவும் சிறந்தவர் எனவும் தெரிவித்திருந்தார்.
![](https://i0.wp.com/itamiltv.com/wp-content/uploads/2023/04/image-10.png?resize=1024%2C576&ssl=1)
இந்த நாய் ஜப்பான் நாட்டின் ஷிபு வகை நாயாகும். Dogecoin எனப்படும் கிரிப்டோகரன்சியின் அடையாளமாக இந்த நாயின் உருவப்படம் உள்ளது. நகைச்சுவையாக பணம் செலுத்தும் முறையை உருவாக்க, மென்பொருள் பொறியாளர்களான பில்லி மார்கஸ் மற்றும் ஜாக்சன் பால்மர் ஆகியோரால் உருவாக்கப்பட்ட Dogecoin கிரிப்டோகரன்சி முறையை எலான் மஸ்க் நீண்ட காலமாக நேரடியாகவும் மறைமுகமாகவும் ஊக்குவித்துள்ளார்.
எலான் மஸ்க்கின் இந்த நடவடிக்கையால் ‘Dogecoin’ எனப்படும் க்ரிப்டோகரென்சி நிறுவனத்தின் பங்குகள் 20% உயர்ந்துள்ளதாக தகவல்கள் தெரிவிக்கின்றன.