மலையாள சினிமாவின் பிரபல தயாரிப்பாளராக விளங்கியவர், கே. ரவீந்திரநாத் நாயர். இவர் 1973ஆம் ஆண்டு அச்சானி என்ற திரைப்படத்தை தயாரித்திருந்தார்.
அதனைத் தொடர்ந்து 1994ஆம் ஆண்டு மம்மூட்டி நடிப்பில் வெளிவந்த விதேயன் என்ற படம், ரசிகர்களின் பலத்த வரவேற்பினை பெற்றிருந்தது. அது மட்டுமன்றி எஸ்தப்பன், காஞ்சனா சீதா, மஞ்சு போன்ற பல படங்களை தயாரித்துள்ளார்.
குறிப்பாக இவர் 1973ஆம் ஆண்டு தயாரித்து வெளியாகிய அச்சானி திரைப்படம் இன்றளவும் ரசிகர்கள் மத்தியில் பெரும் தாக்கத்தை ஏற்படுத்திய திரைப்படமாக உள்ளது. இந்த படத்திற்கு கிடைத்த பெரும் வரவேற்பால், அதை தயாரித்த கே. ரவீந்திரநாத் நாயர், ‘அச்சானி ரவி’ என அழைக்கப்பட்டார். இவர் தயாரித்துள்ள பல படங்கள் பல விருதுகளை பெற்றுள்ளன.
இந்த நிலையில் கேரளா மாநிலம் கொல்லம் பகுதியில் உள்ள சொந்த ஊரில் தனது மூன்று பிள்ளைகளான பிரதாப் நாயர், பிரகாஷ் நாயர், பிரீத்தா நாயர் மற்றும் மனைவி உஷா ரவி உடன் அச்சானி ரவி வசித்து வந்தார். பாடகியான உஷா ரவி, கடந்த 2013ஆம் ஆண்டு உயிரிழந்தார்.
![](https://i0.wp.com/itamiltv.com/wp-content/uploads/2023/07/image-247.png?resize=680%2C382&ssl=1)
இந்த நிலையில் வயது மூப்பு காரணமாக தனது 90வது வயதில் உயிரிழந்தார். அச்சானி ரவியின் மறைவுக்கு கேரள முதலமைச்சர் பிரணாயி விஜயன், கேரள திரைப்பிரபலங்கள் மற்றும் இயக்குநர்கள் உள்ளிட்ட பலரும் இரங்கல் தெரிவித்துள்ளனர்.