பழம்பெரும் திரைப்பட படத்தொகுப்பாளர் ஆர்.விட்டல்(91) மாரடைப்பு காரணமாக நேற்று இரவு உயிரிழந்தார்.
சென்னையில் உள்ள கோடம்பாக்கத்தில் வசித்து வந்தவர் ஆர்.விட்டல். படத்தொகுப்பாளராக சினி உலகில் நுழைந்த ஆர்.விட்டல், ஆடு புலி ஆட்டம், நல்லவனுக்கு நல்லவன், பாயும் புலி, விக்ரம், ராஜா சின்ன ரோஜா, ஜப்பானில் கல்யாணராமன், படிக்காதவன், முரட்டுக்காளை, உள்ளிட்ட 300க்கும் மேற்பட்ட படங்களில் இவர் பணியாற்றியுள்ளார்.
தமிழ் தெலுங்கு உள்ளிட்ட மொழி திரைப்படங்களுக்கு படத்தொகுப்பாளராக இருந்த விட்டல், நடிகர் ஜெய்சங்கர் நடித்த முடிசூடா மன்னன், தொட்டதெல்லாம் பொன்னாகும், வீட்டுக்கு வந்த மருமகள் உள்ளிட்ட 5 படங்களை இயக்கியதோடு ,3 படங்களை தயாரித்தும் உள்ளார்.
இயக்குனர் எஸ்.பி. முத்துராமனின் பல திரைப்படங்களில் படத்தொகுப்பாளராக பணியாற்றியவர். இவர்களது, கூட்டணியில் 70 திரைப்படங்கள் உருவாகியுள்ளன.
இவர் தமிழ் சினிமாவில் முன்னணி நடிகர்களான ரஜினி, கமல் உள்ளிட்டோர் நடித்த ஏராளமான படங்களுக்கு படத்தொகுப்பாளராக பணியாற்றியுள்ளார்.
இந்நிலையில் மாரடைப்பு காரணமாக நேற்று இரவு காலமானார். இவரது மறைவுக்கு தமிழ் திரையுலகை சேர்ந்த பலரும் இரங்கல் தெரிவித்து வருகின்றனர்.அவரது இறுதி சடங்கு இன்று நடைபெறுகிறது.
