மேற்குவங்க மாநிலத்தில் சுமார் 50 ஆண்டுகளாக வெறும் ‘டீ’ (tea)மட்டுமே குடித்து பெண் ஒருவர் உயிர் வாழும் சம்பவம் அதிர்ச்சியையும் ஆச்சரியத்தையும் ஏற்படுத்தியுள்ளது.
மேற்குவங்க மாநிலம், ஹூக்ளி மாவட்டத்தில் உள்ள பெல்தியா கிராமத்தைச் சேர்ந்த 76 வயதாகும், அனிமா சக்ரவர்த்தி என்ற மூதாட்டி கடந்த 50 ஆண்டுகளாக டீ மட்டுமே குடித்து உயிர் வாழ்ந்து வருகிறார்.
அனிமா சக்கரவர்த்தி இளம் வயதில் குடும்ப சூழ்நிலையின் காரணமாக வீட்டு வேலைகள் செய்து வந்த நிலையில், குடும்பத்தை நடத்தி வந்துள்ளார்,
அப்போது, வீட்டு வேலை செய்யும் இடங்களில் தரப்படும் மீதமான உணவுகளை வீட்டிற்குக் கொண்டு வந்து தனது குழந்தைகளுக்கு கொடுத்து வளர்த்து வந்துள்ளார்.
இந்நிலையில், அவர் கொண்டு வரும் உணவில் பெரும்பாலும் அவருக்கு என மீதம் எதுவும் இருக்காது. மேலும், அவர் வேலை செய்யும் இடத்தில் பசியை போக்க டீ (tea) மட்டுமே குடித்து வந்துள்ளார்.
ஆனால், இந்த வாழ்க்கை போராட்டத்தில் ஒரு கட்டத்தில் அந்த வேலைகளை செய்வதை அவர் விட்டு விட்ட போதிலும், அவரது உணவு பழக்கம் மாறாமல் இருந்துள்ளது.
தேநீரும், சத்து பானங்களும் தான் அனிமாவின் உணவு முறையாக அமைந்துவிட்டது, கிட்டத்தட்ட இதுபோல 50 ஆண்டுகளாக அவர் திட உணவுகள் எதுவும் எடுத்துக் கொள்ளாமல் திரவ உணவுகளை மட்டுமே அருந்தி ஆரோக்கியமாகவும் வாழ்ந்து வருகிறார்.
இதுபற்றி முதலில், அந்த கிராமத்துக்கு தெரியாமல் இருந்த நிலையில், தெரிந்த பிறகு அவர்கள் வியப்பும், திகைப்பும் அடைந்தனர்.
ஆனால், இது பற்றி மருத்துவர்கள் கூறுகையில், உரிய ஊட்டச்சத்துகள் கிடைத்தால் போதும், திட உணவுதான் எடுக்கவேண்டும் என்பது அவசியம் இல்லை என்கிறார்கள்.
மேலும், மருத்துவமனைகளில் தீவிர சிகிச்சைப் பிரிவில் உள்ள நோயாளிகளுக்கு கூட, திரவ வடிவில்தானே உடலுக்குத் தேவையான ஊட்டம் வழங்கப்படுகிறது எனவும், அவர்களுக்கு இதனால் எந்த பாதகமும் வருவதில்லை எனவும் மருத்துவர்கள் விளக்கமளிக்கின்றனர்.