தமிழகத்தில் ஜூலை 18ஆம் தேதி முதல் பொறியியல் இரண்டாம் ஆண்டு, 3ஆம் ஆண்டு மாணவர்களுக்கான வகுப்புகள் தொடங்கப்படும் என்று அமைச்சர் பொன்முடி அறிவித்துள்ளார்.
சென்னை தலைமைச் செயலகத்தில் இன்று செய்தியாளர்களை சந்தித்த அமைச்சர் பொன்முடி, ஐடிஐ முடித்த மாணவர்கள் பொறியியல் கல்லூரிகளில் சேர்வதற்கு ஏற்கனவே அனுமதி வழங்கப்பட்டுவிட்டது என்று தெரிவித்தார்.
தற்போது தொழில் கல்வியை முடித்த சுமார் 2000 மாணவர்கள் மெக்கானிக்கல் இன்ஜினியரிங், சிவில் இன்ஜினியரிங் உள்ளிட்ட 6 பிரிவுகளில் மாணவர் சேர்க்கை நடைபெற உள்ளது என்று தெரிவித்த அவர், அண்ணா பல்கலைக்கழகம் உள்பட அனைத்து உறுப்பு கல்லூரிகளிலும், அரசு உதவி பெறும் கல்லூரிகளிலும், தொழில் கல்வி முடித்த மாணவர்களுக்கு 2 சதவீத இட ஒதுக்கீடு அளிக்கப்பட்டுள்ளது என்றும் தெரிவித்தார்.
மேலும் உயர்கல்வி சேரும் மாணவிகளுக்கு ஆயிரம் ரூபாய் வழங்கும் திட்டத்தை தமிழக முதல்வர் ஜூலை மாதம் 15ஆம் தேதி தொடங்கி வைக்கிறார் என்று தெரிவித்த அவர் ஜூலை 18ஆம் தேதி முதல் பொறியியல் இரண்டாம் ஆண்டு, 3ஆம் ஆண்டு மாணவர்களுக்கான வகுப்புகள் தொடங்கப்படும் என்றும் தெரிவித்தார்.
அதேபோல பொறியியல் கல்லூரிகளில் சேர 85 ஆயிரம் பேர் விண்ணப்பித்துள்ளதாகவும் பொறியியல் கல்லூரிகளுக்கு விண்ணப்பித்த அனைவருக்கும் இந்த ஆண்டு நிச்சயம் சீட் கிடைக்கும் என்றும் அமைச்சர் பொன்முடி தெரிவித்துள்ளார்.
