பீகார் மாநிலத்தில் வலம் வரும் “சீரியல் கிஸ்ஸர்” (serial kisser) ஜமுய்-ல் மர்ம நபர் ஒருவர் சுகாதார ஊழியர் ஒருவரை வலுக்கட்டாயமாக முத்தமிடும் வீடியோ வெளியாகி அதிர்ச்சியை ஏற்படுத்தியுள்ளது.
பீகார் மாநிலம் ஜமுய் மாவட்டத்தில், இளம்பெண் ஒருவரை மர்ம மனிதர் ஒருவர் திடீரென்று வலுகட்டாயமாக இழுத்து முத்தமிடும் வீடியோ காட்சி சமூக வலைதளங்களில் வைரல் ஆனது, மேலும், இந்த பாலியல் வன்கொடுமை சம்பவம் பரபரப்பை ஏற்படுத்தியுள்ளது.
இந்த சம்பவம் கடந்த மாதம் மார்ச் 10ஆம் தேதி நடந்ததாகவும், பாதிக்கப்பட்ட அந்த பெண் ஜமுய்-ல் உள்ள மருத்துவமனையில் பணிபுரிந்து வருவதாகவும் சொல்லப்படுகிறது.
சம்பவத்தன்று, குற்றவாளி மருத்துவமனையின் சுவர் ஏறி குதித்து உள்ளே சென்றுள்ளார். அப்போது, அந்த பெண் மொபைல் போனில் பேசிக் கொண்டிருந்த போது திடீரென அந்த மனிதன் அந்த பெண்ணை கட்டிப் பிடித்து வலுக்கட்டாயமாக முத்தமிட்டுள்ளார்.
இதுகுறித்து பாதிக்கப்பட்ட அந்த பெண் காவல் நிலையத்தில் புகார் அளித்துள்ள நிலையில், அந்தப் புகாரின் பேரில் காவல்துறையினர் விசாரணை நடத்தி வருகின்றனர். மேலும், பாதிக்கப்பட்ட அந்த பெண் செய்தி சேனல் ஒன்றுக்கு அளித்த பேட்டியில்..
“அந்த மர்ம மனிதர் ஏன் மருத்துவமனை வளாகத்திற்குள் வந்தார் என்று எனக்கு தெரியாது. அந்த நபரையும் எனக்கு இதற்கு முன்பு தெரியாது. மருத்துவமனை ஊழியர்களை கூச்சலிட்டு அழைத்தேன். ஆனால், அதற்குள் அந்த நபர் (serial kisser) தப்பி ஓடிவிட்டார்” எனவும், எல்லை சுவர் மிகவும் குறுகியதாக இருப்பதால் மருத்துவமனைக்கு வரும் பெண்களை முள்வேலி அமைத்து பாதுகாக்குமாறு அதிகாரிகளிடம் கோரிக்கை விடுத்து இருக்கிறேன் எனவும் அந்த பெண் கூறியுள்ளார்.