நம்ம சென்னைல இலவச மேக்-அப் பயிற்சி..! 100% வேலைவாய்ப்பு.. உடனே விண்ணப்பிங்க…
தாட்கோ கழகம், புகழ்பெற்ற அழகு அழகு நிலையங்களில் பணி புரிவதற்காகவும், சுயதொழில் தொடங்குவதற்காகவும் “அழகு சாதனவியல்” (cosmetology) மற்றும் “சிகை அலங்காரம்” (hair dressing) பயிற்சியை அறிவித்துள்ளது.
தாட்கோ கழகம், தமிழ்நாட்டில் உள்ள ஆதி திராவிடர், ஆதிதிராவிட அருந்ததியர் மற்றும் பழங்குடியினர் பயன்பெறும் வகையில் பல்வேறு திறன் பயிற்சித் திட்டங்களை செயல்படுத்தி வருகிறது.
அந்த வகையில், தற்போது சென்னையில் மகா அழகு கலை பயிற்சி நிலையத்தின் மூலமாக அழகு சாதனவியல் (cosmetology) மற்றும் சிகை அலங்காரம் (hair dressing) பயிற்சியை அறிவித்துள்ளது.
இப்பயிற்சிக்கு ஆதிதிராவிடர் / பழங்குடியின சார்ந்த பத்தாம் வகுப்பு படித்த 18 முதல் 30 வயது வரை உள்ள மாணவர்கள் விண்ணப்பிக்கலாம் என்றும், இந்த பயிற்சிக்கான கால அளவு 45 நாட்கள் எனவும் அறிவித்துள்ளனர்.
மேலும், வெளியூர்களில் இருந்து வரும் மாணவர்களுக்கு, சென்னையில் பயிற்சி அளிக்கும் நிறுவனத்தில் தங்கி படிக்கும் வசதி அளிக்கப்படும் என்றும், இப்பயிற்சியை முழுமையாக முடிக்கும் மாணவர்களுக்கு இந்திய தேசிய திறன் மேம்பாடு (National Skill Development Of India) மூலம் அங்கீகரிக்கப்பட்ட தரச் சான்றிதழ் வழங்கப்படும் என்றும் தாட்கோ நிறுவனம் அறிவித்துள்ளது.
மேலும், இப்பயிற்சியினை பெற்றவர்கள் தனியார் அழகு நிலையங்களில் உடனடியாக பணிபுரிய 100% வேலைவாய்ப்பு அளிக்க நடவடிக்கை மேற்கொள்ளப்பட்டு உள்ளதாகவும் தாட்கோ கழகம் தெரிவித்துள்ளது.
இதன் மூலம், ஆரம்ப கால மாத சம்பளமாக ரூ.15,000/-முதல் ரூ.20,000/- வரைபெற முடியும் எனவும், இப்பயிற்சிக்கான மொத்த செலவுத் தொகையான ரூ.45,000-த்தை தாட்கோ நிறுவனமே ஏற்கும் எனவும் அறிவித்துள்ளது.
இந்த பயிற்சியினை பெற தாட்கோ இணையதளமான www.tahdco.com என்ற இணையதளத்தில் விண்ணபிபிபிக்குமாறு கேட்டுக்கொள்ளப்படுகிறது.