ஆந்திர மாநிலத்தின் முன்னாள் முதலமைச்சர் சந்திரபாபு நாயுடு கைதின் எதிரொலியாக தமிழகத்தில் இருந்து ஆந்திராவுக்கு இயக்கப்படும் தமிழக மற்றும் ஆந்திர பேருந்துகளும், அதேபோல ஆந்திராவிலிருந்து தமிழகம் வரும் பேருந்துகளும் நிறுத்தி வைக்கப்பட்டுள்ளது.
ஆந்திர மாநிலத்தின் முன்னாள் முதலமைச்சரும் தெலுங்கு தேசம் கட்சியின் தலைவருமான சந்திரபாபு நாயுடு ஆட்சிக் காலத்தில் சுமார் 241 கோடி ரூபாய் ஊழல் செய்ததாக அவர் மீது குற்றம்சாட்டப்பட்டுள்ளது.
இதன் அடிப்படையில் எஸ்.ஐ.டி மற்றும் சிஐடி குற்றப் புலனாய்வுத்துறை அதிகாரிகளால் சந்திரபாபு நாயுடு இன்று கைது செய்யப்பட்டுள்ளார். அங்கு ஏராளமான தெலுங்கு தேசம் கட்சியினர் திரண்டதால் பெரும் பரபரப்பு ஏற்பட்டது.
இந்நிலையில் சந்திரபாபு நாயுடுவின் கைதை கண்டித்து அவரது ஆதரவாளர்களும் தெலுங்கு தேச கட்சியின் தொண்டர்களும் ஆந்திர மாநிலத்தில் பல்வேறு இடங்களில் போராட்டம் மற்றும் மறியலில் ஈடுபட்டு வருகின்றனர்.
இதன் காரணமாக தமிழகத்தில் இருந்து ஆந்திராவுக்கு இயக்கப்படும் தமிழக மற்றும் ஆந்திர பேருந்துகளும், அதேபோல ஆந்திராவிலிருந்து தமிழகம் வரும் பேருந்துகளும் நிறுத்தி வைக்கப்பட்டுள்ளது.
அந்த வகையில் தமிழகத்தில் இருந்து வேலூர் வழியாக ஆந்திர மாநிலத்துக்கு இயக்கப்படும் 40 தமிழக அரசுப் பேருந்துகள். 27 தனியார் பேருந்துகள், 63 ஆந்திர மாநில அரசு பேருந்துகள் என 155ற்கும் மேற்பட்ட பேருந்துகள் இயக்கப்படவில்லை.
தமிழக பேருந்துகள் ஆரம்பாக்கம், ஊத்துக்கோட்டை பகுதியிலேயே ஆந்திரா பேருந்துகள் நிறுத்தப்படுவதாக போக்குவரத்து துறை அதிகாரிகள் தெரிவித்துள்ளனர்.
பேருந்து போக்குவரத்து தடைப்பட்டதால் பயணிகள் மிகுந்த சிரமத்திற்கு ஆளாகியுள்ளனர். திருப்பதி செல்வதற்காக சென்ற பக்தர்கள் திரும்பி வருவதற்காக பேருந்துக்கு காத்திருக்கிறார்கள்.
![](https://i0.wp.com/itamiltv.com/wp-content/uploads/2023/09/image-356.png?resize=826%2C465&ssl=1)
இதற்கிடையில் வேலூர் புதிய பேருந்து நிலையத்தில் இருந்து சித்தூர் மாவட்ட ஆட்சியர் அலுவலகம் வரை ஒரு சில தனியார் பேருந்துகள் மட்டும் இயக்குவதாகத் தெரிவித்துள்ளனர்.
ஆந்திர மாநில முன்னாள் முதல்வர் சந்திரபாபு நாயுடு கைது செய்யப்பட்ட விவகாரம் பெரும் கொந்தளிப்பை ஏற்படுத்தியுள்ள நிலையில், அம்மாநிலத்தில் அசம்பாவிதங்களை தவிர்க்கும் வகையில் பாதுக்காப்பு பணிகளுக்காக காவல்துறையினர் குவிக்கப்பட்டு கண்காணிக்கப்பட்டு வருகிறது.