சிறந்த டாகுமென்டரி குறும்படப் பிரிவில் இந்தியாவின் ‘தி எலிபென்ட் விஸ்பெரர்ஸ்’ (the elephant whisperers) ஆவண குறும்படம் ஆஸ்கர் விருது வென்றுள்ளது.
அமெரிக்காவின் லாஸ் ஏஞ்சல்ஸில் உள்ள டால்பி தியேட்டரில் அகாடமி விருது எனப்படும் 95-ஆவது ஆஸ்கர் விருது வழங்கும் விழா நபெற்று வருகிறது. இதனை, ஜிம்மி கிம்மல் தொகுத்து வழங்கி வருகிறார்.
இப்படம் தமிழ்நாட்டில் எடுக்கப்பட்ட நிலையில், சிறந்த டாகுமென்டரி குறும்படப் பிரிவில் இந்தியாவின் ‘தி எலிபென்ட் விஸ்பெரர்ஸ்’ (The Elephant Whisperers) ஆவண குறும்படம் ஆஸ்கர் விருது வென்று சாதனை படைத்துள்ளது.
நீலகிரி மாவட்டம் முதுமலை புலிகள் காப்பகத்திலுள்ள ஆசியாவின் பெரிய வளர்ப்பு யானைகள் முகாமான தெப்பக்காட்டில், காட்டு நாயக்கர் பழங்குடியினத்தைச் சேர்ந்த பொம்மன், பெள்ளி என்ற தம்பதியர் யானை பராமரிப்பாளர்களாக பணிபுரிகின்றனர்.
இந்நிலையில், 2017-ம் ஆண்டு, கிருஷ்ணகிரி மாவட்டம் தேன்கனிக்கோட்டை சரகம் அய்யூர் பகுதியில் தாயிடமிருந்து பிரிந்த ஆண் குட்டி யானை காயத்துடன் சுற்றித்திரிந்த நிலையில், அந்த யானையை முதுமலை புலிகள் காப்பகத்துக்கு கொண்டு வந்தனர். இதையடுத்து, அந்த யானைக்கு ரகு என பெயர் வைத்து பொம்மனும், பெள்ளியும் பராமரித்து வருகின்றனர்.
தாயைப் பிரிந்து தவித்த இரண்டு யானை குட்டிகளை பராமரிக்கும் பழங்குடியினத் தம்பதியின் கதையை ஆவணப்படமாக்கி இருக்கிறார் உதகையைச் சேர்ந்த ஆவணப்பட இயக்குநர் கார்த்திகி கொன்சால்வ்ஸ்.
இந்நிலையில் தான் தற்போது ‘தி எலிபென்ட் விஸ்பெரர்ஸ்’ படம் ஆஸ்கர் விருது வென்றுள்ளது.
முன்னதாக, சிறந்த டாகுமென்டரி திரைப்படப் பிரிவில் இடம்பெற்ற இந்திய திரைப்படமான “ஆர் தட் ப்ரீத்ஸ்” படம் ஆஸ்கர் விருது தவறவிட்டது.
