இறப்பு நாடகம் போட்ட பூனம் : தான் இறந்து விட்டதாகக் கூறி மறுநாளே மீண்டும் தான் உயிருடன் தான் இருக்கிறேன் என வீடியோ வெளியிட்ட நடிகை பூனம் பாண்டே மீது,
நடவடிக்கை எடுக்க வேண்டும் என்று திரைப்பட தயாரிப்பாளர்களும், அரசியல் கட்சி தலைவர்களும் கோரிக்கை விடுத்துள்ளனர்.
கடந்த வியாழக்கிழமை இரவு பிரபல கிளாமர் நடிகை பூனம் பாண்டே, கர்ப்பப்பை வாய் புற்றுநோய் காரணமாக இறந்து விட்டதாகச் செய்திகள் வெளியானது.
இதனை அவருடைய அதிகாரப்பூர்வ இன்ஸ்டாகிராம் பக்கத்தில் வெளியிட்டனர். அவருடைய அவர் மேலாளர் அதை உறுதி செய்திருந்தார்.
இதனால் அனைத்து மீடியாகளும் அவர் இறந்து விட்டதாக அதிகாரபூர்வ செய்திகளை வெளியிட்டனர். அதையடுத்து கங்கனா ரனாவத், அனுபம் கெர் உட்பட பல நடிகர் நடிகைகளும், ரசிகர்களும் அவருடைய இறப்பு செய்தி அறிந்து இரங்கல் தெரிவித்தனர்.
இந்நிலையில், திடீரென தான் உயிருடன் இருப்பதாக கூறி பூனம் பாண்டே வீடியோ ஒன்றை நேற்று வெளியிட்டுள்ளார்.
கர்ப்பப்பை வாய் புற்றுநோய் குறித்த விழிப்புணர்வை ஏற்படுத்தவே, அவ்வாறு செய்ததாகவும் அதில் கூறியுள்ளார்.
மேலும் மற்றொரு வீடியோவில், “எனது இறப்புச் செய்தி அறிந்து கண்ணீர் சிந்தியவர்களுக்காக வருந்துகிறேன்.
எனது நோக்கம், நாம் அதிகம் பேசப்படாத கர்ப்பப்பை வாய்ப் புற்றுநோய் குறித்து பேச வைப்பதுதான்” என்று கூறியுள்ளார்.
அவருடைய இந்த செயலால் சமூக வலைதளங்களில் கடுமையான விமர்சனங்கள் கிளம்பியுள்ளது. இது மோசமான ‘பப்ளிசிட்டி ஸ்டன்ட்’ என்றும்,
விழிப்புணர்வு ஏற்படுத்த பல நல்ல வழிகள் இருக்கும்போது, இந்த மலிவான விளம்பரம் அருவருப்பானதாக இருப்பதாகவும் பலர் விமர்சித்துள்ளனர்.
கர்ப்பப்பை வாய்ப் புற்றுநோய் முற்றிலும் தடுக்கக் கூடியது தான். இதற்காக, இறந்து விட்டதாக பப்ளிசிட்டி செய்திருப்பது அந்த நோய் குறித்து தவறான எண்ணத்தையே ஏற்படுத்தும் என்றும் சிலர் விமர்சித்துள்ளனர்.
இதனிடையே தற்போது அகில இந்திய திரைப்பட ஊழியர்கள் சங்கம் இறப்பு நாடகம் போட்ட பூனம் பாண்டே மீது வழக்கு பதிவு செய்து நடவடிக்கை எடுக்க வேண்டும் என கோரிக்கை விடுத்துள்ளது. அதில்,
“நடிகை பூனம் பாண்டேவின் இந்த செயல் முற்றிலும் தவறானது. புற்றுநோயை பயன்படுத்தி அவர் சுய விளம்பரம் தேடிக்கொள்வதை ஏற்றுக்கொள்ளவே முடியாது.
இவரது இந்த செயலால் திரைத்துறையில் எதாவது உண்மையான மரணங்கள் நடந்தால் கூட மக்கள் நம்ப மாட்டார்கள்.
மற்ற நடிகர்கள் யாரும் தங்களுடைய சுய விளம்பரத்துக்காக இந்த அளவுக்கு கீழ்த்தரமாக சென்றது இல்லை.
எனவே, நடிகை பூனம் பாண்டே மீதும், அவரது மரணத்தை உறுதிசெய்த அவரின் மேலாளர் மீதும் வழக்கு பதிவு செய்து நடவடிக்கை எடுக்க வேண்டும்” என்று தெரிவிக்கப்பட்டுள்ளது.
மேலும், இதுகுறித்து மகாராஷ்டிரா சட்டமேலவை உறுப்பினர் சத்யஜித் தாம்பேயு..
“கர்ப்பப்பை புற்றுநோயால் நடிகை இறந்ததாக சொல்லப்பட்ட செய்தி, நோயைப் பற்றிய விழிப்புணர்வைப் பரப்புவதற்கான ஒரு வழியாக இருக்க முடியாது.
இந்தச் சம்பவம் கவனத்தை முழுவதுமாக நடிகையின் பக்கம் திருப்புவதாக இருக்கிறது.
எனவே, தவறான தகவலை வெளியிட்ட நடிகை பூனம் பாண்டே மீது போலீஸார் நடவடிக்கை எடுக்க வேண்டும்’ என்று குறிப்பிட்டுள்ளார்.