நடிகர் யோகி பாபு மீது திரைப்படத் தயாரிப்பாளர் ஒருவர், பணத்தை வாங்கி கொண்டு படத்தில் நடிக்காமல் ஏமாற்றுவதாக காவல் நிலையத்தில் பரபரப்பு புகார் அளித்துள்ளார்.
சென்னை விருகம்பாக்கம் பகுதியில், ஹாசிர் என்பவர் ‘ROOBY பிலிம்ஸ்’ என்ற பெயரில் திரைப்பட நிறுவனம் நடத்தி வருகிறார். இந்நிலையில், இவர் “ஜாக் டேனியல்” என்ற திரைப்படத்தை தயாரிக்க முடிவு செய்துள்ளார்.
எனவே, அந்த படத்தில் நடிப்பதற்காக நடிகர் யோகி பாபுவியிடம் பேசி, முன்பணம் கொடுத்த பின்னர், அவர் படத்தில் நடிக்க கால் சீட் கொடுக்காமல் ஏமாற்றி வருவதாக காவல் நிலையத்தில் பரபரப்பு புகார் அளித்துள்ளார்.
அவர் அளித்துள்ள அந்த புகாரில்,
தான் தயாரிக்கும் “ஜாக் டேனியல்” படத்தில் நடிப்பதற்காக நடிகர் யோகி பாபுவிடம் ரூ. 65 லட்சம் பேசி முன்பணமாக ரூ. 20 லட்சம் தயாரிப்பாளர் ஹாசிர் காசோலையாக கொடுத்ததாகவும், இந்த நிலையில் திரைப்பட சூட்டிங் தொடங்கியதும் நடிகர் யோகி பாபுவை நடிப்பதற்காக தயாரிப்பு நிறுவனம் அழைத்ததாகவும் ஆனால் யோகி பாபு வராமல் ஏமாற்றி வந்ததாக புகாரில் குறிப்பிடப்பட்டுள்ளது.
மேலும், நடிகர் யோகி பாபுவிடம் பணத்தை திருப்பி தரும்படி தயாரிப்பாளர் ஹாசிர் கேட்டபோது, வாங்கிய பணத்தை திருப்பி தராமல் இழுத்தடித்து வந்ததாகவும் கூறி தயாரிப்பாளர் ஹாசிர் விருகம்பாக்கம் காவல் நிலையத்தில் நடிகர் யோகி பாபு மீது இன்று புகார் அளித்துள்ளார்.
அதையடுத்து, இந்த புகார் தொடர்பாக காவல் துறையினர் விசாரணை நடத்தி வருகின்றனர்.