Manikavannar temple : ஐ தமிழ் நேயர்களுக்கு அன்பான வணக்கம்.
“பதவி உயர்வும், பணியிடமாற்றமும் செய்துத் தர சிவன்,
திருமணத் தடைகள்,குழந்தைப்பேறு அருள அம்பாள்,
பில்லி,சூன்யம்,ஏவல், மாந்தீரிகம் மற்றும் நோய்கள் போக்க துர்க்கை –
இவையாவும் ஒரே தலத்தை தரிசித்தாலே கிட்டும் என்றால் அதைவிட என்ன வேண்டும் ? மயிலாடுதுறை மாவட்டம் வைத்தீஸ்வரன்கோயில் அருகிலுள்ள திருவாளப்புத்தூரில் வீற்றிருந்து அருள்பாலிக்கும் ஸ்ரீ வண்டமர் பூங்குழல் நாயகி சமேத ஸ்ரீ மாணிக்க வண்ணர் கோயிலுக்கு (Manikavannar temple) உங்களை அழைத்துச் செல்வதில் ஐ தமிழ்த் தாய் மிகுந்த மகிழ்ச்சி கொள்கிறது. சம்மந்தர், சுந்தரர் ஆகியோரால் தேவாரப்பாடல் பெற்ற காவிரி வடகரைத்தங்களில் இது 29 -வது தலமாகும்.
“தேவர்கள் பாற்கடலை கடைந்தபோது, மத்தாக பயன்பட்ட வாசுகி பாம்பு பலவீனமடைந்தது. களைப்பில் தன்னையும் மீறி , விஷத்தை உமிழ்ந்து விட்டது. எனவே, சிவன் விஷத்தை எடுத்து உண்டுவிட்டார். தன் செயலுக்கு வருந்திய வாசுகி, இத்தலத்தில் மாணிக்ககல்லை உமிழ்ந்து, சிவனை வேண்டி பூஜை செய்தது.
வாசுகிக்குக் காட்சி தந்து மன்னித்தருளிய சிவன், சுயம்புலிங்கமாக இத்தலத்தில் எழுந்தருளினார். அதனால் அவருக்கு மாணிக்கவண்ணர் என்ற பெயர் ஏற்பட்டதாம்.”
இப்படியோர் தலவரலாறு இருக்க, இத்தலத்தில் சுயம்புலிங்கமாக இக்கோயில் உருவானவதாக இன்னொரு கதையும் கூறப்படுகிறது. “ஒருசமயம் அர்ஜுனன் இத்தலம் வழியாக சென்றபோது தாகம் எடுக்கவே,எங்கு தேடியும் நீர் கிடைக்கவில்லை. எனவே, ஓரிடத்தில் களைப்பில் அமர்ந்து விட்டான். அப்போது அங்கு வந்த முதியவர் ஒருவரிடம் தாகமாக இருப்பதால், நீர் தரும்படி கேட்டான்.
அந்த முதியவரோ, அர்ஜுனனிடம் ஒரு தண்டத்தை கொடுத்து, அருகிலிருக்கும் ஓரிடத்தை சுட்டிக்காட்டி, “அங்கு தோண்டினால் நீர் வரும்” என்றார்.அர்ஜுனன், தான் வைத்திருந்த வாளை முதியவரிடம் கொடுத்துவிட்டு, அவர் காட்டிய இடத்திற்கு நீர் அருந்த சென்றான். முதியவரோ அருகிலிருந்து புற்றில் அர்ஜூனன் வாளை மறைத்து வைத்துவிட்டு சென்றுவிட்டார். அர்ஜுனன் நீர் அருந்திவிட்டு திரும்பியபோது, முதியவரை காணவில்லை.
அவரைத் தேடி, அவர் நடந்து சென்ற பாத தடத்தைப் பின்தொடர்ந்தபோது, அத்தடம் அருகிலிருந்த புற்றில் முடிந்தது. அந்த புற்றினுள் வாள் இருந்ததைக் கண்ட அர்ஜுனன், அதனை எடுத்தபோது, சுயம்புலிங்கம் இருப்பதைக் கண்டான்.
சிவன் அவனுக்கு காட்சி தந்து, தானே முதியவராக வந்ததை உணர்த்தினார். பின் இவ்விடத்தில் கோயில் எழுப்பி அர்ஜுனன் வழிபட்டான்” என்கிறது இன்னொரு கதை.
இதையும் படிங்க : வேண்டுவன யாவும் நிறைவேறும் ஸ்ரீ சுந்தரநாயகி சமேத ஸ்ரீ அக்னீஸ்வரர் ஆலயம்!!
ஜாதக ரீதியாக பாதிப்புள்ளவர்கள் ராகு, கேது ,தோஷம் உள்ளவர்கள் இத்தல விநாயகருக்கும், சிவனுக்கும் அர்ச்சனை செய்து நிவர்த்தி பெறுகிறார்கள்.
இங்குள்ள ஈசனோ, பதவி உயர்வும், பணியிட மாற்றமும் அருளுவதாக இருக்க, அம்பாளோ திருமணத் தடைகளை அகற்றி புத்திரப்பேறு தருபவளாக வீற்றுள்ளாள். மகிழாசுரனை வதம் செய்து உக்கிரமான துர்க்கை, இத்தலத்தில் எட்டு கரங்களோடு ‘அஷ்டபுஜ துர்கையாக ‘ சாந்த சொரூபியாக காட்சி தருகிறாள். தவக்கோலத்தில் இருக்கும் மீனாட்சி அம்பாள் கையில்தான் பச்சைக்கிளி அமர்ந்திருக்கும். நமது பிரார்த்தனைகளை பச்சைக்கிளி கேட்டு அம்பாளிடம் எடுத்து சொல்லுவதாக ஐதிகம்.
ஆனால் இங்கு துர்க்கை கையில் பச்சை கிளி இருப்பது ஆச்சரியமான ஒன்று. இதுபோல் வேறெந்த தலத்திலும் இல்லை. மேலும் ஞாயிற்றுக்கிழமைகளில் ராகு காலத்தில் இத்தலத்து துர்க்கையை வழிபட, உடல் பிணி யாவும் தீரும்.
சனி தோஷம் விலகும். வேறு எந்த கோயிலிலும் தட்சிணாமூர்த்திக்கு எதிரே நந்திதேவர் இருக்க மாட்டார்.. ஆனால் இத்தலத்திலே எதிரில் நந்திதேவர் அமர்ந்திருப்பது கூடுதல் விசேஷம். இந்த தட்சிணாமூர்த்தி எதிரில் மெய்கண்ட நாயனார் தன் உடல் பிணிப் போக்க கடுந்தவம் இருந்து வியாதி நிவர்த்தி அடைந்த பின், இங்கேயே தவம் செய்து முக்தி அடைந்தார் என்பது வரலாறு.
எனவே உடல்நலம் காத்தருள்பவராக தட்சிணாமூர்த்தி இருக்கிறார் என்பதை அறியலாம்.
புறாக்களின் கூடாராமாகிவிட்டது இக்கோயில். தலவிருச்சமான வாகை மர காட்டுப் புற்றில் தோன்றிய இத்தலத்து ஈசன், மீண்டும் புற்றில் மறைந்து போகும் வண்ணம் இக்கோயில் சிதலமடைந்துவிட, தற்போது மெய்யன்பர்களால் புதுப்பிக்கும் திருப்பணி நடந்து கொண்டிருப்பது ஆறுதல் தருகிறது. “திருப்பணியில் தங்களையும் இணைத்துக்கொள்பவர்களுக்கு எல்லா வகையிலும் ஈசன் திருவருள் கிட்டும்” என்கிறார் இத்தலத்து சிவாச்சாரியார் கமலக்கண்ணன். வாழ்வில் ஒரு முறையேனும் இத்தலத்தை தரிசித்து பலன் பெற ,உங்களை கேட்டுக்கொள்வதோடு, மீண்டும் ஒரு அற்புதமான தலத்தில் சந்திக்கும் வரை உங்களிடமிருந்து விடைபெறுவது ஐ தமிழ் !