பிரபலமான நபராக இருப்பதாலே ஒருவரின் தனிப்பட்ட வாழ்விற்குள் அத்துமீறி நுழைந்து தரம் தாழ்ந்த விமர்சனங்கள் வைப்பதும் ஏற்புடையதல்ல என்று இசையமைப்பாளர் ஜி.வி.பிரகாஷ் குமார் கருத்து தெரிவித்துள்ளார்.
கடந்த 2013 ஆம் ஆண்டு இசையமைப்பாளரும் நடிகருமான ஜி.வி.பிரகாஷ்,பாடகி சைந்தவியும் காதலித்து திருமணம் செய்துக் கொண்டனர். இவர்களுக்கு ஒரு குழந்தை உள்ளது.
தற்போது ஜி.வி.பிரகாஷ் படங்களுக்கு இசையமைப்பதோடு, ஹீரோவாகவும் நடித்து வருகிறார்.இந்த நிலையில்,தம்பதியினர் இருவருக்கும் இடையே சமீபகாலமாக கருத்து வேறுபாடு நிலவி வருவதாக தகவல் பரவி வந்தது.
இப்படியான நிலையில் ஜி.வி.பிரகாஷ் குமார், சைந்தவி ஆகிய இருவரும் நேற்று முன்தினம் இரவில் (ஜூன் 13) தாங்கள் பரஸ்பரம் பிரிவதாக அறிவித்தனர்.
இந்த அறிவிப்பு ரசிகர்கள் மத்தியில் பெரும் அதிர்ச்சியை ஏற்படுத்தியது. மேலும் இதற்கு என்ன காரணம் என பலரும் பலவிதமாக சமூக வலைத்தளங்களில் கருத்துகளை பதிவிட்டனர். நேற்று சமூக வலைத்தளங்கள் முழுக்க முழுக்க இவர்கள் பற்றிய பேச்சுகளாக தான் இருந்தது.
இந்த நிலையில், பிரபலமான நபராக இருப்பதாலே ஒருவரின் தனிப்பட்ட வாழ்விற்குள் அத்துமீறி நுழைந்து தரம் தாழ்ந்த விமர்சனங்கள் வைப்பதும் ஏற்புடையதல்ல என்று இசையமைப்பாளர் ஜி.வி.பிரகாஷ் குமார் தெரிவித்து அறிக்கை ஒன்றை பதிவிட்டுள்ளார்.
அதில்,புரிதலும், போதுமான விவரங்கள் இல்லாமலும் அனுமானத்தின் பேரில் இரு மனங்கள் இணைவது, பிரிவது குறித்து பொதுவெளியில் விவாதிக்கப்படுது துரதிஷ்டவசமானது.பிரபலமான நபராக இருப்பதாலே ஒருவரின் தனிப்பட்ட வாழ்விற்குள் அத்துமீறி நுழைந்து தரம் தாழ்ந்த விமர்சனங்கள் வைப்பதும் ஏற்புடையதல்ல.
தங்களின் கற்பனைக்கு வார்த்தைகள் மூலம் வடிவம் கொடுத்து சமூக ஊடகங்களில் வெளிப்படுத்துவதால் அது “யாரோ ஒரு தனிநபரின்” வாழ்க்கையை பாதிக்கும் என்பதை உணராத அளவுக்கு தமிழர் மாண்பு குறைந்து விட்டதா…?இருவரும் பரஸ்பரம் ஒப்புக்கொண்டு பிரிந்ததன் பின்னணியையும்,
காரணங்களையும் என்னுடன் நெருங்கிய பழகிய நண்பர்கள், உறவினர்கள் நன்கறிவார்கள். அனைவரிடமும் கலந்தாலோசித்து பின்புதான் இருவரும் இந்த முடிவை மேற்கொண்டோம்.
எங்களை பிரபலங்களாக உருவாக்கிய உரிமையிலோ அல்லது என் தனிப்பட்ட வாழ்க்கை மீது தங்களுக்கு இருந்த பேரன்பின் வெளிப்பாடாகவோ தங்களின் ஆதங்கமான விமர்சனங்கள் இருந்தாலும் சம்பந்தப்பட்டவர்களின் மனதை அது மிகவும் காயப்படுத்துகிறது என்பதை உணர்த்தவே இதை பதிவிடுகிறேன்.
ஒவ்வொரு தனி மனிதரின் நியாயமான உணர்வுக்கும் மதிப்பளியுங்கள் . தங்களின் பேரன்புக்கும் ஆதரவுக்கும் என் நெஞ்சார்ந்த நன்றி என்று குறிப்பிட்டுள்ளார்.
