‘தி.மு.க.,வின் முக்கியமான கொள்கை, இந்தி எதிர்ப்பு, இந்தி திணிப்பை எப்போதும் எதிர்ப்போம். அதிலிருந்து ஒருபோதும் விலக மாட்டோம், கைவிட மாட்டோம். அது நமது மாநில உரிமை. இப்போதுதான் ஆர்ப்பாட்டம் நடத்தினோம். அதை போராட்டமாக மாற்றுவதா இல்லையா என்பது உங்கள் கையில் தான் உள்ளது” என திமுக இளைஞரணி செயலாளரும், எம்எல்ஏவுமான உதயநிதி ஸ்டாலின் கூறியுள்ளார்.
திமுக இளைஞரணி மற்றும் மாணவர் அணி சார்பில், இந்தித் திணிப்புத் திட்டத்தை மத்திய அரசு திரும்பப் பெற வலியுறுத்தியும், ஒரே பொது நுழைவுத் தேர்வு திட்டத்தையும் திரும்பப் பெற வலியுறுத்தி திமுக இளைஞர் அணி, மாணவர் அணி சார்பில் தமிழகம் முழுவதும் பல்வேறு இடங்களில் இன்று கண்டன ஆர்ப்பாட்டம் நடைபெற்றது.
சென்னை வள்ளுவர் தொகுதியில் நடைபெற்ற ஆர்ப்பாட்டத்தில், அக்கட்சியின் இளைஞரணிச் செயலர் உதயநிதி ஸ்டாலின், மாணவர் அணிச் செயலர் சி.வி.எம்.பி. எழிலரசன் ஆகியோர் கலந்து கொண்டனர். இந்த ஆர்ப்பாட்டத்தில் கோரிக்கைகளை வலியுறுத்தி கண்டனங்கள் எழுப்பப்பட்டன. ஆர்ப்பாட்டத்தில் ஆயிரக்கணக்கான இளைஞர்கள் மற்றும் மாணவர்கள் கலந்து கொண்டனர்.
இந்த ஆர்ப்பாட்டத்தில் திமுக இளைஞரணி செயலாளர் உதயநிதி ஸ்டாலின் பேசுகையில், “”மத்திய, ஒன்றியம் என்று சொன்னால் கோபித்துக் கொள்வார்கள், அதனால் அப்படியே சொல்லுவோம். மத்திய பிரதமர் மோடி, மத்திய உள்துறை அமைச்சர் அமித்ஷா, நீங்கள் நினைப்பது போல் இங்கு நடப்பது முன்பு போல் அதிமுக ஆட்சி இல்லை. இப்போது முதலமைச்சராக இருப்பவர் எடப்பாடி பழனிசாமியோ, ஓ.பன்னீர்செல்வமோ அல்ல, முத்துவேல் கருணாநிதி ஸ்டாலின்தான் தமிழகத்தை ஆள்கிறார்.
இப்போதுதான் ஆர்ப்பாட்டம் நடத்தினோம். அதை போராட்டமாக மாற்றுவது உங்கள் கையில் தான் உள்ளது. திமுகவின் முக்கியமான கொள்கை இந்தி எதிர்ப்பு, இந்தி திணிப்பை எப்போதும் எதிர்ப்போம். நாங்கள் ஒருபோதும் அசைந்து கொடுக்க மாட்டோம். அது நமது மாநில உரிமை.
எதிர்க்கட்சியாக இருந்தாலும் சரி, ஆளுங்கட்சியாக இருந்தாலும் சரி, எங்கள் தலைவர் விடமாட்டார். காரணம், தந்தை பெரியார், அறிஞர் அண்ணா, கலைஞர் முத்தமிழர் வழியில் இருந்து வந்தவர்கள் நாம். இந்தி திணிப்பை எதிர்த்து திமுக ஆட்சிக்கு வந்தது.
இப்போது ஆளும் கட்சியாக இருப்பதால் கண்டிப்பாக ஒருநாள் ஆர்ப்பாட்டம் நடத்தினோம், கூடி கலைந்து சென்றோம் என்று சொல்ல மாட்டோம். நீங்கள் எந்த வழியில் இந்தி திணிப்பை தமிழ்நாட்டிற்கு கொண்டு வந்தாலும், நாங்கள் உங்களுக்கு சொல்லப்போகும் ஒரே வார்த்தை “இந்தி தெரியாது” என்பதுதான். நாங்கள் எப்போதும் அதைத்தான் சொல்கிறோம்.
திமுகவில் 3 மொழிப்போர் இருந்தது. அதில் இரண்டை திமுக மாணவர் அணி நடத்தியது. இப்போது இந்தி எதிர்ப்புப் போராட்டத்தில் மாணவர் அணியும், இளைஞர் அணியும் இணைந்துள்ளோம். இந்த இரு அணிகளும் இணைந்து கடந்த 4 ஆண்டுகளில் அனைத்துப் போட்டிகளிலும் வெற்றி பெற்றுள்ளன. இந்தப் போராட்டத்திலும் வெற்றி பெறுவோம்.
கலைஞர் கட்டிய வள்ளுவர் கோட்டத்தில் முதல் கட்ட போராட்டத்தை நடத்தியுள்ளோம். ஹிந்தி திணிப்பை கையில் எடுத்தால் அடுத்த கட்ட போராட்டம் தமிழகத்தில் மட்டும் நடக்காது, தலைவரின் உத்தரவை ஏற்று டெல்லிக்கு வந்து போராட்டம் நடத்துவோம்.
உங்கள் இந்தி திணிப்பை தமிழக மக்கள் ஒருபோதும் ஏற்க மாட்டார்கள். அண்ணன் தயாநிதி மாறன் கூறியது போல் 2019 தேர்தலில் பாசிச பா.ஜ.க.வை எப்படி தோற்கடித்தோமோ, அது போல 2024 தேர்தல் பிரச்சாரத்திற்கு இது ஒரு சிறந்த தொடக்கமாக அமையும். 2019ஆம் ஆண்டு போலவே 2024ஆம் ஆண்டு தேர்தலிலும் பாஜகவை தமிழக மக்கள் விரட்டியடிப்பார்கள்’’ என்றார்.
