கர்நாடகாவில் காவல்துறையில் சேர்வதற்கான வயது வரம்பை உயர்த்தக்கோரி இளைஞர்கள் நடத்திய போராட்டத்தின்போது. காவல்துறை அதிகாரி ஒருவர் இளைஞரை அறைந்த சம்பவம் பரபரப்பை ஏற்படுத்தியுள்ளது.
கர்நாடக மாநிலம், தும்கூரு அரசு பள்ளியில் கன்னட ராஜுட்சவா விழா நடைபெற்றது. இதில் கர்நாடக உள்துறை அமைச்சர் அரக ஞானேந்திரா பங்குபெறுவதாக தகவல் வெளியானதையடுத்து பள்ளியை இளைஞர்கள் சூழ்ந்தனர். அப்போது ஒரு இளைஞர் அமைச்சரிடம் பேசுவதற்காக வேண்டுகோள் விடுத்த போது காவல்துறை அதிகாரி ஒருவர் அந்த இளைஞரை பளார் என அறைந்தார். இந்த சம்பவம் போராட்டத்தில் ஈடுபட்ட இளைஞர்கள் மத்தியில் பெரும் பரபரப்பை ஏற்படுத்தியது. காவல்துறை அதிகாரிகளிடம் இளைஞர்கள் வாக்குவாதத்தில் ஈடுபட்டனர்.
இதனையடுத்து, ஒருவழியாக அமைச்சரை சந்தித்த இளைஞர்கள், காவல்துறை பணியில் சேர்வதற்கான வயது வரம்பை அதிகரிக்க வேண்டும் என கேட்டுக்கொண்டனர். பின்பு அமைச்சரின் காலில் விழுந்து அழுதனர். இதனையடுத்து இளைஞர்களின் கோரிக்கையை ஏற்றுக்கொண்ட அமைச்சர் உரிய நடவடிக்கை எடுப்பதாக உறுதியளித்தார்.
இந்த நிலையில், காவல்துறை அதிகாரி இளைஞரை அறைந்த வீடியோ வைரலானதை அடுத்து, துணை எஸ்பி. ஸ்ரீனிவாஸ், அந்த இளைஞர்களில் ஒருவர் காவல்துறை அதிகாரிகளை தவறாக பேசியதால், அதிகாரி அறைந்ததாகக் விளக்கமளித்துள்ளார்.
இதுகுறித்து இந்தியன் எக்ஸ்பிரஸ் பத்திரிக்கையாளருக்கு பேட்டியளித்த அவர்; “உள்துறை அமைச்சரைச் சந்திக்க அவர்களுக்கு நான் ஒரு வாய்ப்பை வழங்குவேன் என்று உறுதியளித்தேன், ஆனால் அமைச்சரைச் சந்திப்பதற்கு முன் சில பாதுகாப்பு நெறிமுறைகள் உள்ளன. ஆனால் இளைஞர்கள் அதையும் மீறி காவல்துறையைப் பற்றி தவறாகப் பேசினர் என துணை எஸ்.பி ஸ்ரீநிவாஸ் கூறினார்.
சிட்டி ஆர்ம்ட் ரிசர்வ் (சிஏஆர்) போலீஸ் கான்ஸ்டபிள் காலியிடங்களுக்கு காவல்துறை ஆட்சேர்ப்பு பிரிவு சார்பில் சமீபத்தில் விண்ணப்பங்களை பெறப்பட்டுவருகிறது. பொதுப் பிரிவினருக்கு அதிகபட்ச வயது வரம்பு 25 ஆகவும், எஸ்சி, எஸ்டி மற்றும் ஓபிசி வகுப்பினருக்கு 27 ஆகவும் இருந்தது.
இதுகுறித்து காவல்துறை ஆட்சேர்ப்புக்கு விண்ணப்பித்திருந்த இளைஞர் ஒருவர் கூறும்பொழுது, ‘கோவிட் -19 தொற்றுநோய்களின் போது ஆட்சேர்ப்பு பாதிக்கப்பட்டுள்ளதால், வயது வரம்பை உயர்த்துமாறு அமைச்சரைச் சந்திக்க விரும்புவதாக கூறினார். “ராஜஸ்தான், தெலுங்கானா, ஆந்திரா, தமிழ்நாடு மற்றும் கேரளா போன்ற மாநிலங்கள் வயது வரம்பை உயர்த்தியிருந்தாலும், கர்நாடக மாநிலத்தில் இன்னும் வயது வரம்பை உயர்த்தவில்லை.
குறைந்த பட்சம் வயது வரம்பை இரண்டு அல்லது மூன்று ஆண்டுகள் அதிகரிக்க வேண்டும் என்று உள்துறை அமைச்சரிடம் கோரிக்கை விடுக்க வந்துள்ளதாக இளைஞர் தெரிவித்தார்.