இன்று (21.02.24) புதன்கிழமை காலை சட்ட நிபுணர் Legal Expert ஃபாலி நாரிமன் காலமானார். அவரது மறைவுக்கு பிரதமர் நரேந்திர மோடி, காங்கிரஸ் தலைவர் மல்லிகார்ஜுன கார்கே உள்ளிட்ட அரசியல் தலைவர்கள் இரங்கல் தெரிவித்துள்ளனர்.
பிரபல சட்ட நிபுணரும், முன்னாள் கூடுதல் சொலிசிட்டர் ஜெனரலுமான ஃபாலி நாரிமன், வயது மூப்பு காரணமாக உடல்நிலை பாதிக்கப்பட்ட நிலையில், இன்று அதிகாலை 12.45 மணி அளவில் டெல்லியில் காலமானார். அவருக்கு வயது 95.
இவர் 1929ம் ஆண்டு ஜனவரி 10ம் தேதி பிறந்தார். கடந்த 1950ஆம் ஆண்டு பாம்பே உயர் நீதிமன்றத்தில் வழக்கறிஞர் பணியை தொடங்கினார் நாரிமன்.
இதையும் படிங்க : DMK Rule : ஆண்டவனால் கூட காப்பாற்ற முடியாது – EPS!
தொடர்ந்து 1972ம் ஆண்டு மே மாதம், கூடுதல் சொலிசிட்டர் ஜெனரலாக நியமிக்கப்பட்டதை அடுத்து, அவர் டெல்லிக்கு இடம் பெயர்ந்தார்.
அப்போது அவசரநிலை பிரகடனம் அமல்படுத்தப்பட்டதை அடுத்து விதிக்கப்பட்ட கட்டுப்பாடுகளை எதிர்த்து அவர் தனது பதவியை ராஜினாமா செய்தார்.
ஃபாலி நாரிமன் போபால் விஷவாயு விபத்து வழக்கு, முன்னாள் முதல்வர் ஜெயலலிதாவின் சொத்துக்குவிப்பு வழக்கு உள்ளிட்ட பல்வேறு முக்கிய வழக்குகளில் திறம்பட வாதாடியவர்.
1999ம் ஆண்டு மாநிலங்களவை உறுப்பினராக தேர்வு செய்யப்பட்ட இவர், பத்மபூஷன், பத்மவிபூஷன் ஆகிய விருதுகளைப் பெற்றவர். இவரது மகன் ரோஷிண்டன் நாரிமன், உச்சநீதிமன்ற நீதிபதியாக இருந்தவர்.
இந்நிலையில், வயது மூப்பு காரணமாக ஃபாலி நாரிமன் இன்று உயிரிழந்தார். அவரது மறைவை அடுத்து அரசியல் தலைவர்கள் பலரும் இரங்கல் தெரிவித்துள்ளனர்.
பிரதமர் நரேந்திர மோடி தனது எக்ஸ் பக்கத்தில் வெளியிட்டுள்ள பதிவில், “மிகச் சிறந்த சட்ட நிபுணர்கள் மற்றும் அறிவுஜீவிகளில் Legal Expert ஃபாலி நாரிமனும் ஒருவர்.
சாதாரண மக்களுக்கு நீதி கிடைக்க வேண்டும் என்பதற்காக அவர் தமது வாழ்க்கையை அர்ப்பணித்தார். அவரது மறைவு எனக்கு வேதனை அளிக்கிறது.
அவரது குடும்பத்தினர் மற்றும் நண்பர்களுக்கு இரங்கலைத் தெரிவித்து கொள்கிறேன். அவரது ஆத்மா சாந்தியடையட்டும்.” என தெரிவித்துள்ளார்.
இதையும் படிங்க : ஏ.வி.ராஜூ பேச்சு – நடிகர் கருணாஸ் புகார்!
உச்ச நீதிமன்றத் தலைமை நீதிபதி டி.ஒய். சந்திரசூட், “அவர் ஒரு மிகச்சிறந்த அறிவுஜீவி” என புகழாரம் சூட்டியுள்ளார்.
காங்கிரஸ் தலைவர் மல்லிகார்ஜூன கார்கே விடுத்துள்ள இரங்கல் செய்தியில், “புகழ்பெற்ற சட்ட வல்லுநர், மூத்த வழக்கறிஞர் மற்றும் அரசியலமைப்புச் சட்டத்தின் சிவில் உரிமைகளின் தீவிர ஆதரவாளர் ஃபாலி எஸ் நாரிமனின் மறைவு சட்ட அமைப்புக்கு மிகப்பெரிய இழப்பாகும்.
அவர் தனது கொள்கைகளில் அசைக்க முடியாத உறுதியுடன் இருந்தார். அவரது குடும்பத்தினருக்கும், நண்பர்களுக்கும், நாட்டு மக்களுக்கும் எனது ஆழ்ந்த அனுதாபங்கள். அவரது ஆன்மா சாந்தியடையட்டும்” எனத் தெரிவித்துள்ளார்.