உத்திர பிரதேசம், லக்னோவில் கடும் குளிர் (cold wave) காரணமாக பள்ளிகள் காலை 10 மணி முதல் மதியம் 2 மணி வரை மட்டுமே செயல்படும் என்று அறிவிக்கப்பட்டுள்ளது.
உத்தரப் பிரதேசத்தில், கடும் குளிர் நிலவி வரும் நிலையில், அதன் காரணமாக லக்னோவில் உள்ள அங்கீகரிக்கப்பட்ட அனைத்துப் பள்ளிகளிலும் 1 முதல் 8 வரையிலான வகுப்புகளுக்கு காலை 10 மணி முதல் மதியம் 2 மணி வரை மட்டுமே வகுப்புகள் நடைபெறும் என்றும், மேலும், இந்த நடைமுறை இன்று முதல் வருகிற ஜனவரி 10-ம் தேதி வரை செயல்படுத்தப்படும் என்றும் தெரிவிக்கப்பட்டுள்ளது.
மாவட்ட மாஜிஸ்திரேட் உத்தரவின் பேரில், உத்தரப் பிரதேசத்தின் அடிப்படைக் கல்வித்துறையின் கீழ் உள்ள பள்ளிகளில் மாணவர்களின் நலன் மற்றும் ஆரோக்கியத்தை கருத்தில் கொண்டு இந்த நடவடிக்கை எடுக்கப்பட்டுள்ளதாக தெரிவிக்கப்பட்டுள்ளது.
மேலும், சீதாபூரில் நிலவும் கடும் குளிர் (cold wave) மற்றும் பனிமூட்டம் காரணமாக 1 முதல் 12-ம் வகுப்பு வரையிலான மாணவர்களுக்கு இன்று முதல் 4-ந்தேதி வரை விடுமுறை அறிவித்து மாவட்ட மாஜிஸ்திரேட் உத்தரவிட்டுள்ளார்.
இதனையடுத்து, இந்த தகவல் வாட்ஸ் அப் மூலம் மாணவர்களின் பெற்றோருக்கு உடனடியாக தெரிவிக்கப்பட்டது. மேலும், கோரக்பூரில் இன்று மற்றும் நாளை இரண்டு நாட்களுக்கு எல்.கே.ஜி முதல் 8-ம் வகுப்பு வரை படிக்கும் மாணவர்களுக்கு விடுமுறை அறிவிக்கப்பட்டுள்ளது.
மேலும், இந்த கடும் பனிமூட்டமானது பஞ்சாப், அரியானா, சண்டிகார், டெல்லி, உத்தரப் பிரதேசம் மற்றும் பீகார் உள்ளிட்ட மாநிலங்களில் வியாழக்கிழமை வரை நிலவும் என்றும் வானிலை ஆய்வு மையம் தெரிவித்துள்ளது.
