தமிழக காவல்துறையால் கைது செய்யப்பட்ட தனது கணவர் பெலிக்ஸ் ஜெரால்டை உயிருடன் மீட்டுத் தாருங்கள் என்று அவரது மனைவி ஜேன் ஆஸ்டின் கோரிக்கை விட்டுள்ளார்.
![](https://i0.wp.com/itamiltv.com/wp-content/uploads/2024/05/felix-wife-01.jpg?resize=1024%2C576&ssl=1)
தழிழகக் காவல்துறையில் உள்ள பெண் காவலர்களையும், காவல்துறை அதிகாரிகளையும் இழிவாகப் பேசியதாக யூடியூபர் சவுக்கு சங்கர் கைது செய்யப்பட்டுள்ளார். அவர்மீது கஞ்சா கடத்தியதாகவும் வழக்கு பதிவு செய்யப்பட்டுள்ளது.
ரெட் பிக்ஸ் யூடியூப் சேனல் நேர்காணலில் தான் சவுக்கு சங்கர் இந்த கருத்தைத் தெரிவித்தார். இதனால், சவுக்கு சங்கரின் பேட்டியை ஒளிபரப்பிய ரெட் பிக்ஸ் தலைமை ஆசிரியர் பெலிக்ஸ் ஜெரால்டு மீதும் நடவடிக்கை எடுக்க வேண்டும் என்று வழக்கு விசாரணையின்போது நீதிபதி தெரிவித்தார்.
இதனையடுத்து 10ஆம் தேதி இரவு, டெல்லியில் வைத்து திருச்சி தனிப்படை காவல்துறையினர் பெலிக்ஸ் ஜெரால்டை கைது செய்திருப்பதாகத் தெரிவித்தனர்.
இந்த நிலையில், தனது கணவர் குறித்து எந்த தகவலும் தெரியவில்லை என்பதால், அவரை உயிருடன் மீட்டுத் தரக்கோரி திருச்சி எஸ்.பி. அலுவலகத்திற்கு பெலிக்ஸின் மனைவி ஜேன் ஆஸ்டின் மனு அளிக்க வந்திருந்தார்.
![](https://i0.wp.com/itamiltv.com/wp-content/uploads/2024/05/3-8.jpg?resize=1024%2C576&ssl=1)
அவர் தனது புகார் மனுவில், 10ஆம் தேதி இரவு கணவருக்கு போன் செய்தபோது, திருச்சி கண்டோன்மெண்ட் காவல்நிலையத்தில் பணிபுரியும் வீரமணி என்பவர், கணவரை கைது செய்திருப்பதாகத் தெரிவித்தார்.
அதன் பின்னர் ரயிலில் திருச்சிக்கு அழைத்து வந்து நீதிமன்றத்தில் ஆஜர்படுத்துவதாகச் சொன்னார்கள். ஆனால் டிக்கெட் கிடைக்காததால் சாலை மார்க்கமாக அழைத்து வருவதாக தெரிவித்தனர்.
ஆனால் இதன் பின்னர் தொடர்பு கொண்டபோது செல்போனை கணவரோ, போலீசாரோ எடுக்கவில்லை.
இதனால், திருச்சியில் உள்ள அனைத்து காவல்நிலையங்களிலும், நீதித்துறை நடுவர் நீதிமன்றங்களிலும் விசாரித்தபோது எனது கணவரை திருச்சிக்கு கொண்டுவரவில்லை, ஆஜர்படுத்தவில்லை என்பது தெரியவந்தது.
இதையும் படிங்க: நாளை பிளஸ் 1 தேர்வு முடிவு; கைபேசிக்கு வரும் குறுஞ்செய்தி
கைது செய்யப்பட்டு 24 மணி நேரத்துக்கு மேலாகியும் எனது கணவர் எங்கிருக்கிறார் என்பது தெரியாமல் உள்ளது.
எனவே எனது கணவரை கண்டுபிடித்து அவரை மீட்டுத்தருமாறு கேட்டுக் கொள்கிறேன்.
இவ்வாறு தனது புகார் மனுவில் கூறியிருந்தார்.
தொடர்ந்து எஸ்.பி. அலுவலகத்தில் காந்திருந்தவர், அவர் வராததால், செய்தியாளர்கள் மத்தியிலும் தனது கணவரை மீட்டுத்தர காவல்துறை நடவடிக்கை எடுக்க கேட்டுக் கொண்டார்.