gokulraj murder case-கோகுல்ராஜ் படுகொலை செய்யப்பட்ட வழக்கில் ஆயுள் கைதியாக உள்ள யுவராஜுக்கு, சிறையில் முதல் வகுப்பு ஒதுக்கக் கோரிய மனுவுக்கு பதிலளிக்கும்படி கோவை சிறை நிர்வாகம், மாவட்ட ஆட்சியருக்கு சென்னை உயர் நீதிமன்றம் உத்தரவிட்டுள்ளது.
சேலம் மாவட்டம், ஓமலூரைச் சேர்ந்த பொறியியல் மாணவர் கோகுல்ராஜ். பட்டியல் சமூகத்தைச் சேர்ந்த இவர் வேறு சமூகத்தை சேர்ந்த பெண்ணை காதலித்தது தொடர்பாக கடந்த ஜூன் 23, 2015-ல் படுகொலை செய்யப்பட்டார். இந்த கொலை வழக்கில் தீரன் சின்னமலை கவுண்டர் பேரவை அமைப்பின் நிறுவனர் யுவராஜ் உட்பட 15 பேரை சிபிசிஐடி போலீசார் கைது செய்தனர்.
இதனை தொடர்ந்து கோகுல்ராஜ் உடற்கூராய்விற்காக தனி மருத்துவ நிபுணர்களை நியமிக்கவேண்டும் என மூத்த வழக்கறிஞர் சங்கரசுப்பு கோரிக்கை விடுத்தது தான் வழக்கின் அடித்தளத்தையே மாற்றியது.
இந்த கோரிக்கையை அப்போதைய நீதிபதிகள் ஏற்று நியமதித்ததன் பேரில் சம்பத் என்ற மருத்துவரின் தலைமையில் மருத்துவக்குழு அமைக்கப்பட்டது.அந்த மருத்துவக்குழு செய்த உடற்கூராய்வின் முடிவில் கோகுல் ராஜ் மரணம் தற்கொலை அல்ல கொலை’ என தெரியவந்தது.
மேலும் குற்றம் சந்தேகத்திற்கு இடமின்றி நிரூபிக்கப்பட்டு தீரன் சின்னமலை பேரவை தலைவர் யுவராஜ் உள்ளிட்ட 10 பேருக்கு சிறப்பு நீதிமன்றம் விதித்த ஆயுள் தண்டனையை உறுதி செய்தது சென்னை உயர் நீதிமன்றம் உத்தரவிட்டது.இந்த நிலையில் , ஆயுள் கைதியாக உள்ள யுவராஜுக்கு, சிறையில் முதல் வகுப்பு ஒதுக்கக் கோரி மனு ஒன்றை அளித்துள்ளார்.
அதில், யுவராஜின் சமூக அந்தஸ்து மற்றும் அவரது கல்வித் தகுதி ஆகியவற்றை அடிப்படையாக கொண்டு அவருக்கு முதல் வகுப்பு ஒதுக்க உத்தரவிட வேண்டுமென கோரிக்கை விடுக்கப்பட்டு இருந்தது.
இதையும் படிங்க: கோகுல்ராஜ் படுகொலை வழக்கு: வழக்கறிஞர் ப.பா. மோகனை ஆரத்தழுவிய திருமா!
அதற்க்கு பதிலளிக்கும்படி கோவை சிறை நிர்வாகம், மாவட்ட ஆட்சியருக்கு சென்னை உயர் நீதிமன்றம் உத்தரவிட்டது. இந்த மனு மீதான விசாரணை நீதிபதிகள் எம்.எஸ்.ரமேஷ், சுந்தர் மோகன் அமர்வில் விசாரணைக்கு வந்தது.
அப்போது, மனுதாரர் தரப்பில் வழக்கறிஞர் எஸ்.காசிராஜன் ஆஜராகி, தங்களது மனுவை முறையாக பரிசீலிக்காமல் ஆட்சியர் பரிந்துரைப்படி சிறை நிர்வாகம் நிராகரித்துள்ளதாக கூறினார்.இதற்கு குற்றவியல் வழக்கறிஞர் ராஜ் திலக் ஆஜராகி, மனு குறித்து பதிலளிக்க அவகாசம் வேண்டுமென கேட்டுக்கொண்டார்.
இதனை ஏற்றுக் கொண்ட நீதிபதிகள், மனுவுக்கு பதிலளிக்கும்படி, சிறை நிர்வாகம், மாவட்ட ஆட்சியர் பதிலளிக்க உத்தரவிட்டு விசாரணையை ஏப்ரல் 29-ம் தேதிக்கு தள்ளிவைத்தனர்.