சிவகாசி பட்டாசு ஆலை வெடிவிபத்தில் உயிரிழந்தவர்களின் குடும்பத்துக்கு எஸ்டிபிஐ மாநில தலைவர் நெல்லை முபாரக் இரங்கல் தெரிவித்துள்ளார்.
இதுதொடர்பாக அவர் விடுத்துள்ள அறிக்கை வருமாறு:-
![](https://i0.wp.com/itamiltv.com/wp-content/uploads/2024/05/nellai-mubarak.jpg?resize=1024%2C576&ssl=1)
சிவகாசி அருகே செங்கமலப்பட்டி பட்டாசு ஆலையில் ஏற்பட்ட பயங்கர வெடி விபத்தில் 10 பேர் உயிரிழந்த சம்பவம் மிகவும் அதிர்ச்சியும், வேதனையும் அளிக்கின்றது. விபத்தில் உயிரிழந்தவர்களின் குடும்பத்தினருக்கு ஆழ்ந்த இரங்கலை தெரிவித்துக் கொள்கிறேன்.
காயம்பட்டவர்கள் விரைவாக குணம்பெற இறைவனை பிரார்த்திக்கிறேன். தமிழக அரசு உயிரிழந்த தொழிலாளர்களின் குடும்பத்தினருக்கு தலா ரூ.25 லட்சம் இழப்பீடு வழங்க வேண்டும். காயமடைந்தவர்களுக்கு உயர்தர சிகிச்சையும் நிவாரண உதவியும் வழங்க வேண்டும் எனவும் கேட்டுக்கொள்கின்றேன்.
![](https://i0.wp.com/itamiltv.com/wp-content/uploads/2024/05/crackers-fire02.jpg?resize=1024%2C576&ssl=1)
வறட்சி பகுதியான விருதுநகர் மாவட்டத்தின் சிவகாசி உள்ளிட்ட பல்வேறு பகுதியில் உள்ள மக்கள், தங்களின் வறுமை, வயிற்று பிழைப்புக்காக ஆபத்தான இந்த தொழிலில் ஈடுபடுகின்றனர். இங்கு அடிக்கடி நடக்கும் விபத்துக்களில் பலர் பலியாவது வேதனையளிக்கும் விஷயமாக உள்ளது. இந்த வெடி விபத்தால் ஒருபுறம் உயிரிழப்புகள் என்றால், மறுபுறம் விபத்துக்களால் ஏற்பட்ட ஊனமுற்றோரின் எண்ணிக்கை பல நூறைத் தாண்டுகிறது.
இதையும் படிங்க: 10 ம் வகுப்பு பொது தேர்வில் வெற்றி – முதல்வர் ஸ்டாலின் வாழ்த்து..!!
தரமற்ற மற்றும் தடை செய்யப்பட்ட வெடிமருந்து பொருட்கள், அங்கீகாரமற்ற பட்டாசு ஆலைகள், அனுமதிக்கப்பட்ட அளவை விட அதிக மருந்து, அதிக பணியாளர்களை பயன்படுத்துவது, அதிக வெடி மருந்துகளை பதுக்குவது உள்ளிட்ட விதிமுறை மீறல்களே விபத்திற்கு மூலகாரணமாக அமைகிறது.
![](https://i0.wp.com/itamiltv.com/wp-content/uploads/2024/05/crackers-fire01.jpg?resize=1024%2C576&ssl=1)
விதிமுறை மீறலும், அதிகாரிகளின் கண்துடைப்பான ஆய்வுமே தொடர் விபத்துகளுக்கு காரணம்.
ஆகவே, அதிகாரிகள் முறையான ஆய்வு மேற்கொண்டு, விதிமுறை மீறி செயல்படும் ஆலைகள் மீது கடும் நடவடிக்கை எடுத்தால் மட்டுமே தொடரும் பட்டாசு ஆலை வெடிவிபத்து மற்றும் உயிரிழப்புகளை தடுக்க முடியும்.
இவ்வாறு அவர் அந்த அறிக்கையில் தெரிவித்துள்ளார்.