Mansoor Ali Khan-வேலூர் தொகுதி சுயேட்சை வேட்பாளர் மன்சூர் அலிகானுக்கு பலாப்பழம் சின்னம் ஒதுக்கப்பட்டுள்ளது.
சினிமாவாகட்டும், அரசியலாகட்டும் தன் மனதில் உள்ளதை ஒளிவுமறைவின்றி பட்டென உடைத்துப் பேசுபவர் நடிகர் மன்சூர் அலிகான். அதிமுக, நாம் தமிழர் என்று அரசியல்கட்சிகளில் தலைகாட்டி வந்தவர், தேர்தல்களிலும் போட்டியிட்டு தோல்வியை பரிசாகப் பெற்றுக் கொண்டிருக்கிறார்.
கடந்த சில வாரங்களுக்கு முன்பாக திடீரென்று இந்திய ஜனநாயகப் புலிகள் என்னும் கட்சியைத் தொடங்கிய மன்சூர் அலிகான் இந்தியா முழுவதும் மாற்றம் கொண்டு வர இருப்பதாக மேஜையை தட்டி ஊடகங்களில் பேட்டி எல்லாம்தட்டினார். தேர்தல் தேதி அறிவிக்கப்பட்டதும் ஆரணி தொகுதியில் தான் போட்டியிடப் போவதாக முன்கூட்டியே அறிவித்தார்.
![Mansoor Ali Khan](https://i0.wp.com/itamiltv.com/wp-content/uploads/2024/03/image-615.png?resize=750%2C450&ssl=1)
இதையும் படிங்க: Parliamentary Elections : ஆரணி தொகுதியில் போட்டியிட போகிறேன்.. மன்சூர் அலிகான்!!
அதிமுகவில் கூட்டணி சேர மன்சூர் அலிகான் கொடுத்த கடிதத்தின் பேரில் அவரை அதிமுக தலைமைக்கழகத்துக்கு அழைத்தும் பேசினார்கள். ஆனால் பேச்சுவார்த்தை முடிவை எட்டவில்லை. இதனிடையே மன்சூர் அலிகானையே கட்சியில் இருந்து நீக்குவதாக திடீரென தோன்றிய புகைச்சல், என்னப்பா இது மன்சூருக்கு வந்த சோதனை என்றே எல்லோரையும் பேசவைத்தது.
அந்த காமெடி களேபரங்கள் சரியானதை தொடர்ந்து, தான் வேலூரில் போட்டியிடுவதாக அறிவித்தார். சொன்னபடியே வேட்புமனு தாக்கல் தொடங்கிய அன்றே போய் சுடச்சுட மனுத்தாக்கலும் செய்தார். சுயேட்சையாக களம் இறங்கும் தனக்கு பலாப்பழம், கிரிக்கெட் பேட், லாரி உள்ளிட்ட சின்னங்களையும் கேட்டிருந்தார். ஒருவேளை பலாப்பழம் சின்னம் கிடைத்தால் தலையில் வைத்துக்கொண்டு ஓட்டு கேட்கப் போவேன் எனவும் பல்லைக்காட்டியபடி நகைச்சுவையாக மன்சூர் அலிகான் தெரிவித்திருந்தார்.
![Mansoor Ali Khan](https://i0.wp.com/itamiltv.com/wp-content/uploads/2024/03/image-616.png?resize=637%2C414&ssl=1)
இதையும் படிங்க: ‘டார்ச் லைட்’ பிடிக்க மறுக்கும் மன்சூர் அலிகான்!
டார்ச் லைட் சின்னம் இருப்பதாக தேர்தல் ஆணையம் தெரிவித்ததற்கு, தனக்கு விளக்குப் பிடிப்பதில் விருப்பமில்லை; அதனால் டார்ச் லைட் வேண்டாம். வேலூர் தொகுதியில் அதிக வாக்கு எண்ணிக்கையில் வெற்றியை ருசிப்பேன் என்றும் கூறியிருந்தார்.
இந்த நிலையில், மன்சூர் அலிகானுக்கு பலாப்பழம் சின்னத்தை தேர்தல் ஆணையம் ஒதுக்கீடு செய்துள்ளது.
தற்போது பலாப்பழம் சீசன். ஏற்கனவே பலாப்பழம் கிடைத்தால் தலையில் வைத்துக்கொண்டு ஓட்டு கேட்பேன் என்றார். இனி என்னவெல்லாம் செய்வாரோ என்று வேலூர் மக்கள் இப்போதே ஆர்வமாகி உள்ளனர்.