ஐ தமிழ் நேயர்களுக்கு நல்வணக்கம்.
27 நட்சத்திரங்களில் ‘தரணி ஆள்வர்’ என்று ஜோதிட சாஸ்திரம் கூறுகின்ற பரணி நட்சத்திரத்தில் பிறந்தவர்கள், தங்கள் வாழ்வு மேம்பட, நாடி வந்து தரிசிக்க வேண்டிய தலம்தான் ஸ்ரீ சுந்தரநாயகி சமேத ஸ்ரீ அக்னீஸ்வரர் ஆலயம்.
மயிலாடுதுறை மாவட்டம் தரங்கம்பாடி வட்டம் நல்லாடையில் அமைந்திருக்கும் பழம் பெருமை வாய்ந்த ஸ்ரீ அக்னீஸ்வரர் ஆலயத்திற்கு உங்களை அழைத்துச் செல்வதில் மிகுந்த பெருமிதம் கொள்கிறது ஐ தமிழ் தாய் !
மார்க்கண்டேயனுக்கு என்றும் பதினாறு என்று சிரஞ்சீவி வரம் அளித்த தலம் ஸ்ரீ அபிராமி உடனுறையும் ஸ்ரீ அமிர்தகடேஸ்வரர் ஆலயம் என்பதை அறிந்திருப்பீர்கள். ஆனால் அந்த மார்க்கண்டேயன் தனக்கு மகனாகப் பிறக்க வேண்டும் என்று வரம் வேண்டி, அவனது தந்தை மிருகண்ட ரிஷி
‘புத்திர காமேஷ்டி யாகம்’ நடத்திய தலம் இந்த அக்னீஸ்வரர் ஆலயம்தான் என்பது பலரும் அறியாதது.
ஆக மிருகண்ட ரிஷியே புத்திர பாக்கியம் வேண்டி வழிபட்ட தலம் இது என்றால், புத்திரப்பேறு அருளுவதில் அளப்பரிய சக்தி கொண்டது இத்தலம் என்பதை நீங்கள் புரிந்து கொள்ளலாம்.
முதலில் மார்க்கண்டேயன் பிறப்பையும், இத்தலத்திற்கு திருநல்லாடை என்ற பெயர் வந்த சுவையான வரலாற்றையும், தெரிந்து கொள்வோம்.
” மிருகண்ட ரிஷி , தனக்கு குழந்தை வரம் வேண்டி, புத்திர காமேஷ்டி யாகம் நடத்துவதற்கு பொருள் உதவிக் கேட்டு, அப்போதைய மன்னன் விசித்திர வீரசோழனிடம் விண்ணப்பித்தார். மன்னரும் மன மகிழ்ச்சியுடன் நிறைவான பொருள் உதவி அளித்தார்.
இத்தலத்தின் கிழக்குப் பகுதியில் குண்டம் அமைத்து, மாசி மாத மகா சிவராத்திரி அன்று யாகம் தொடங்கி, நான்காம் கால பூர்ணாஹூதி நிறைவுபெறும் நேரத்தில், சாலிய மாமுனிவர் என்ற சிவனடியார், ஒரு நவரத்தின பரிசுத்த பட்டாடை ஒன்றினை, மன்னரிடம் கொடுத்து அதனை அக்னீஸ்வரர் மீது சாத்தும்படி கேட்டுக்கொண்டார்.
இதையும் படிங்க : அன்னை காமாட்சி அருள் புரியும் ஆண்டார் பந்தி!!
அதனை மன்னர் ரிஷிகளிடம் கொடுக்க, ரிஷிகளோ அந்த பட்டாடையை தீடீரென ஹோம தீயில் இட்டனர். அதனைக் கண்ட சாலிய மாமுனிவர் பதட்டத்தோடு பட்டாடையை தீயில் எரிய விட்டதை கண்டு மனம் வருந்தினார்.
அப்போது, மிருகண்ட மகரிஷி “பக்தா மனம் வருந்தாதே…. நீ கொடுத்த ஆடையை அக்னியில் இட்டு அழிக்கவில்லை.அக்னி வடிவிலுள்ள எம்பெருமான் அக்னீஸ்வரருக்கே அளித்தோம். நாளை இறைவனின் திருமேனியில் அவ்வாடை இருப்பதை நீ காண்பாய் ” எனக் கூறினார்.
அவ்வண்ணமே தீயிலிட்ட அந்த ஆடை ஈசனின் திருமேனியில் நல்லாடையாக இருக்க கண்ட முனிவர் பேரானந்தம் அடைந்து, கண்ணீர் மல்க, ” அன்பருக்கு அன்பரே அருள் சுரக்கும் திருநல்லாடை தரித்த நாதரே “என்று மகிழ்ச்சி பொங்க பாடினார்.
அதனால் இத்தலத்திற்கு ‘திருநல்லாடை’ என்று பெயர் ஏற்பட்டது. மகரிஷி யாகம் நடத்திய இடம் இன்றும் குண்டம் குளம் என்றழைக்கப்படுகிறது.
யாகம் நடத்தி வழிபட்ட பின் மிருகண்ட மகரிஷிக்கு மார்க்கண்டேயன் மகனாகப் பிறந்தான். இந்த யாகம் நிறைவு பெற்று மிருகண்ட ரிஷியின் பிரார்த்தனை நிறைவேறிய நாள் பரணி நட்சத்திர தினம்.
எனவேதான் பரணி நட்சத்திரக்காரர்களுக்கு இத்தலம் பரிகார ஸ்தலமாக போற்றப்படுகிறது.
கி.பி. 1146 முதல் 1163 வரை ஆட்சி செய்த இரண்டாம் இராஜராஜசோழன் காலத்தில் அக்னீஸ்வரர் திருக்கோயிலின் கருவறை கருகல்லால் எழுப்பப்பட்டது.
அந்தச் சோழ மன்னனுக்கு ஏற்பட்ட பிரம்மஹத்தி தோஷத்தை நிவர்த்தி செய்த தலமும் இதுவாகும். அர்த்தநாரீஸ்வரர் அனைத்து ஆலயங்களிலும் நின்ற கோலத்தில் காட்சியளிப்பார்.
ஆனால் இவ்வாலயத்தில் அமர்ந்த கோலத்தில் இருப்பது தனிச்சிறப்பு. எம பயம் நீங்குவதோடு, கணவன் – மனைவி ஒற்றுமைக்கு சிறப்பானதாகும்.
ஆயிரம் சிவாலயங்களை தரிசித்த பலன், இந்த மேற்கு திசை நோக்கியுள்ள அக்னீஸ்வரரை வணங்க கிடைக்கும். “ஒவ்வொரு மாதமும் பரணி நட்சத்திர நாளன்று அக்னி வேள்வி நடைபெறுகிறது. அன்றைய நாளில் பரணி நட்சத்திரக்காரர்கள் சுவாமி அம்பாளை வணங்க, இரட்டிப்புப் பலன் கிடைக்கும்.
வேண்டுவன யாவும் நிறைவேறும். சுத்தமான நல்லண்ணெய்யால் எள் தீபம் ஏற்றி வழிபட, திருமணத் தடை நீங்கும். பித்ரு தோஷம் நிவர்த்தியாகும் “
மீண்டும் ஓர் அற்புதமான தலத்தில் சந்திக்கும்வரை உங்களிடமிருந்து விடைபெறுவது உங்கள் ஐ தமிழ் !