திமுக – விசிக இடையில் எந்த விரிசலும், நெருடலும் இல்லை என்றும் நாங்கள் எங்கள் கொள்கை நிலைப்பாட்டில் உறுதியாக தான் இருக்கிறோம் என்றும் விசிக தலைவர் தொல்.திருமாவளவன் தெரிவித்துள்ளார்.
விசிக நிர்வாகிகளுடன் இன்று காலை 11.30 மணியளவில் திமுக தலைமையகமான அண்ணா அறிவாலயத்தில் வைத்து தமிழக முதல்வர் மு.க.ஸ்டாலினை விசிக தலைவர் தொல். திருமாவளவன் சந்தித்தார்.
அப்போது, முதல்வர் மு.க. ஸ்டாலினிடம் கள்ளக்குறிச்சியில் வரும் அக்டோபர் 2-ஆம் தேதி நடைபெறவுள்ள ‘மது மற்றும் போதைப்பொருள் ஒழிப்பு மகளிர் மாநாடு’ தொடர்பாக கோரிக்கை மனு ஒன்றை அளித்தார்.
அதன் பின்னர் செய்தியாளர்களை சந்தித்த திருமாவளவன் கூறியதாவது,
“முதல்-அமைச்சர் மு.க.ஸ்டாலின் அமெரிக்க சுற்றுப்பயணத்தை வெற்றிகரமாக முடித்துக் கொண்டு சென்னை திரும்பியிருக்கும் நிலையில், விசிக சார்பில் அவரை சந்தித்து எங்களது வாழ்த்துகளையும், பாராட்டுகளையும் தெரிவித்தோம்.
முதல்வரின் இந்த சுற்றுப்பயணத்தில் ரூ.9000 கோடி அளவிலான 19 முதலீட்டு ஒப்பந்தங்கள் கையெழுத்தாகியுள்ளன. இந்த பயணம் வரலாற்று முக்கியத்துவம் வாய்ந்தது என பாராட்டுகளைத் தெரிவித்தோம்
வரும் அக்டோபர் 2-ஆம் தேதி விசிக சார்பில் நடைபெறும் ‘மது மற்றும் போதைப்பொருள் ஒழிப்பு மகளிர் மாநாடு’ நிமித்தமாக இரண்டு முக்கியமான கோரிக்கைகள் கொண்ட மனுவை முதல்வரிடம் வழங்கி உள்ளோம்.
அதில் முதலாவது கோரிக்கையாக தமிழ்நாட்டில் அரசு மதுபானக் கடைகளின் விற்பனை இலக்கை படிப்படியாகக் குறைக்க வேண்டும் என்பதாகும்.
இரண்டாவது கோரிக்கை, அரசமைப்புச் சட்டம் உறுப்பு எண் 47-ன் படி படிப்படியாக மதுவிலக்கை இந்திய அளவில் கொண்டு வருவதற்கு அனைத்து மாநில அரசுகளும் முன்வர வேண்டும் என்பதாகும்.
முதல்வர் எங்களின் கோரிக்கை மனுவை படித்துப் பார்த்த பின்னர், “திமுகவின் கொள்கைதான் மதுவிலக்குக் கொள்கை. மதுவிலக்கு தமிழ்நாட்டில் அமலுக்கு வரவேண்டும் என்பதில் மாற்றுக் கருத்தில்லை. நிர்வாகச் சிக்கல்களை கருத்தில் கொண்டு அதைப் படிப்படியாக நிறைவேற்ற முயற்சி செய்வோம்.
இதையும் படிங்க : ‘மட்ட’ பாடலுக்கு நடனமாட முதலில் அணுகியது இவரை தான்? – வெங்கட் பிரபு!
தேசிய அளவில் மதுவிலக்கு என்ற உங்கள் கோரிக்கையை உங்களோடு சேர்ந்து நாங்களும் மத்திய அரசின் கவனத்துக்கு எடுத்துச் செல்ல, அழுத்தம் கொடுக்க விரும்புகிறோம். எனவே, அக்.2 மாநாட்டில் திமுக சார்பில் அமைப்புச் செயலாளர் ஆர்.எஸ்.பாரதி, செய்தித் தொடர்பு செலாளர் டிகேஎஸ் இளங்கோவன் ஆகியோர் உறுதியாக பங்கேற்பார்கள்” என்று கூறினார்.
தொடர்ந்து பேசிய திருமா, மதுவிலக்கு கருத்தில் உடன்படுவோர் எங்கள் மாநாட்டில் பங்கேற்பதில் எங்களுக்கு எந்த ஆட்சேபனையும், தடையும், தயக்கமும் இல்லை என்று கூறினார்.
அதனைத் தொடர்ந்து ஆட்சியில் பங்கு : அதிகாரத்தில் பங்கு வீடியோ தொடர்பாக செய்தியாளர்கள் கேட்ட கேள்விக்குப் பதிலளித்த திருமாவளவன்,
“ஆட்சியில் பங்கு; அதிகாரத்தில் பங்கு” என நான் பேசியது பற்றி முதல்-அமைச்சர் எதுவும் பேசவில்லை. ஏனெனில், அது 1999-ல் இருந்து நான் பேசி வரும் கருத்து. அது இப்போது சமூக ஊடகங்களில் பெரிதாகப் பேசப்படுகிறது. அந்தக் கருத்தை நாங்கள் இப்போதும், எப்போதும் பேசுவோம். எப்போது வலுவாகப் பேச வேண்டுமோ அப்போது அதை வலுவாகப் பேசுவோம்.
மற்றபடி திமுக – விசிக இடையில் எந்த விரிசலும், நெருடலும் இல்லை. நாங்கள் எங்கள் கொள்கை நிலைப்பாட்டில் உறுதியாக இருக்கிறோம். அதை நாங்கள் முன்னிறுத்துகிறோம்” என்று கூறினார்.
