தமிழ்நாட்டில் மின்கட்டணங்கள் உயர்த்தப்பட்டதன் காரணமாக மின்வாரியத்திற்கு (TN Electricity Board) 7 மாதங்களில் ரூ.23,863.29 கோடி கூடுதல் வருவாய் கிடைத்திருக்கும் போதிலும்,
மின்சார வாரியத்தின் இழப்பு குறைவதற்கு பதிலாக அதிகரித்திருப்பது அதிர்ச்சியளிக்கிறது என பாமக தலைவர் அன்புமணி ராமதாஸ் தெரிவித்துள்ளார். இதுகுறித்து அவர் கூறியிருப்பதாவது..
“மின்சாரக் கொள்முதல் செலவு அதிகரித்திருப்பதுதான் இழப்புக்கான முதன்மைக் காரணம் என்று கூறப்படும் நிலையில்,
கடனில் மூழ்கிக் கொண்டிருக்கும் மின்சாரவாரியத்தைக் காப்பாற்ற உடனடியாக சீர்திருத்தங்களை மேற்கொள்ள வேண்டிய கட்டாயம் அரசுக்கு ஏற்பட்டிருக்கிறது.
2022&23-ம் நிதியாண்டு நிறைவடைந்து 10மாதங்கள் நிறைவடைந்து விட்ட நிலையில், அந்த ஆண்டுக்கான ஆண்டறிக்கையை இப்போதுதான் வெளியிட்டிருக்கிறது.
அதன்படி, மின்வணிகத்தின் மூலமான வருவாய் முந்தைய ஆண்டின் வருவாயான ரூ.56,994.48 கோடியிலிருந்து ரூ.23,863.29 கோடி அதிகரித்து ரூ.80,857.77 கோடியாக இருக்கிறது.
2021&22 -ம் ஆண்டில் மின்சாரவாரியத்தின் மொத்த இழப்பு ரூ.9,130 கோடி ஆகும். மின் வாரியத்திற்கு 7 மாதங்களில் ரூ.18,400 கோடி கூடுதல் வருமானம் கிடைத்துள்ள நிலையில்,
அதன் உதவியுடன் 2022&23-ம் ஆண்டில் தமிழ்நாடு மின்சாரவாரியம் இழப்பிலிருந்து மீண்டு, சுமார் ரூ.10,000 கோடி அளவுக்கு இலாபம் ஈட்டியிருக்க வேண்டும்.
ஆனால், முந்தைய ஆண்டின் இழப்பைவிட அதிகமாக 2022&23-ம் ஆண்டில் ரூ.9192.25 கோடி இழப்பை தமிழ்நாடு மின்சார வாரியம் சந்தித்திருக்கிறது. இது நியாயமற்றது.
ஒரு மாநிலத்தின் மின்சார வாரியம், சொந்தமாக மின்சாரம் உற்பத்தி செய்ய ஆகும் செலவை விட 5 மடங்கு அதிக தொகைக்கு வெளியிலிருந்து மின்சாரம் வாங்கினால், அது இழப்பிலிருந்து மீளவே முடியாது.
தமிழ்நாடு மின்சார வாரியம் கடந்த ஆண்டில் ரூ.10,622 கோடி மதிப்புக்கு மின்சாரம் உற்பத்தி செய்துள்ள நிலையில், ரூ.50,990 கோடிக்கு வெளியிலிருந்து மின்சாரம் வாங்கியுள்ளது.
இதற்குக் தமிழ்நாடு மின்சார வாரியத்தின் சார்பில், பல ஆண்டுகளாக புதிய மின்சாரத் திட்டங்கள் செயல்படுத்தபடாததுதான் காரணம்.
அதனால் ஒரு யூனிட் ரூ.3 முதல் ரூ.4 வரையிலான செலவில் வாங்கப்பட வேண்டிய மின்சாரத்தை வெளிச்சந்தையில் ரூ.9 என்ற அளவில் தமிழ்நாடு மின்சார வாரியம் தொடர்ந்து வாங்கி வருவதுதான் மின்வாரியத்தின் இழப்புக்கு காரணம் ஆகும்.
இதன் காரணமாக தமிழ்நாடு மின்சார வாரியத்தின் மொத்த இழப்பு கடந்தஆண்டில் ரூ.1,37,533 கோடியாக அதிகரித்திருக்கிறது.
தமிழ்நாட்டில் 17,340 மெகாவாட் திறன் கொண்ட அனல் மின்திட்டங்கள் உருவாக்கப்பட்டு 17 ஆண்டுகளாக கிடப்பில் போடப்பட்டுள்ளன.
கடந்த 2014-ம் ஆண்டுக்குப் பிறகு 5,700 மெகாவாட் மின்திட்டங்கள் தொடங்கப்பட்டு பல்வேறு நிலைகளில் நிலுவையில் உள்ளன.
இத்திட்டங்கள் தொடங்கப்பட்டு பத்தாண்டுகள் நிறைவடையப் போகும் நிலையில், இவற்றிலிருந்து இதுவரை ஒருமெகாவாட் மின்சாரம் கூடஉற்பத்தி செய்யபடவில்லை.
தமிழ்நாட்டில் 17,970 மெகாவாட் அனல் மின்திட்டங்களை அடுத்த 10 ஆண்டுகளில் செயல்படுத்தப் போவதாக தமிழக அரசு அறிவித்திருந்தது.
நிலுவையில் உள்ள மின்திட்டங்கள் அனைத்தும் விரைவாக செயல்படுத்தப்பட்டு, தமிழ்நாட்டுக்கான மின் தொகுப்பில் சேர்க்கப்பட வேண்டும்.
அதன் மூலம் மின்சாரக் கொள்முதல் செலவைக் குறைந்து, தமிழ்நாடு மின்சார வாரியத்தை (TN Electricity Board) மீண்டும் லாபத்தில் இயக்கச் செய்ய தமிழகஅரசு நடவடிக்கை எடுக்க வேண்டும்.” என தெரிவிக்கப்பட்டுள்ளது.
