சர்ச்சையை கிளப்பிய வீடியோ – யூடியூபர் இர்பானுக்கு மக்கள் நல்வாழ்வுத் துறை நோட்டீஸ்..!!

தனக்கு பிறக்க போகும் குழந்தையின் பாலினத்தை துபாயில் தெரிந்துகொண்டு அதனை வீடியோவாக ( youtuber irfan ) எடுத்து யூடியூபில் வெளியிட்ட பிரபல யூடியூபர் இர்பானுக்கு தமிழ்நாடு மருத்துவம் மற்றும் மக்கள் நல்வாழ்வுத் துறை மெமோ அனுப்பியுள்ளது.

இதுகுறித்து தமிழ்நாடு மருத்துவம் மற்றும் மக்கள் நல்வாழ்வுத் துறை வெளியிட்டுள்ள செய்தியில் கூறிருப்பதாவது :

பிரபல வலைஒளியாளர் இர்பான் தனது மனைவியுடன் துபாய் சென்ற போது தனது மனைவியின் கருவில் உள்ள சிசுவின் பாலினத்தை ஸ்கேன் பரிசோதனை மூலம் தெரிந்து கொண்டு அதனை குடும்ப நிகழ்ச்சி ஒன்றின் போது அங்கு கூடி இருந்தவர்களிடம் தெரிவித்துள்ளார்.

அந்த நிகழ்வினை ஒளிப்படமாக எடுத்து 19.05.2024 அன்று தனது You tube Channal-ன் மூலம் இர்பான் வெளியிட்டுள்ளார். அதனை இதுவரை பல லட்சம் பார்வையாளர்கள் உலகம் முழுவதும் பார்த்தும் பகிர்ந்தும் உள்ளனர்.

Also Read : சர்ச்சையை கிளப்பிய வீடியோ – யூடியூபர் இர்பானுக்கு மக்கள் நல்வாழ்வுத் துறை நோட்டீஸ்..!!

இந்தியாவில் சிசுவின் பாலினம் அறிவதும் அறிவிப்பதும் பாலின தேர்வை தடை செய்தல் சட்டம் 1994 (PCPNDT ACT 1994) (Central Act 57 of 1994) ன் படி தடை செய்யப்பட்டுள்ளது. இத்தகைய செயலால், தமிழ்நாடு மட்டுமல்லாமல் அகில இந்திய அளவில் பெண் குழந்தைகளின் பிறப்பு விகிதம் குறையும். மேலும், பெண்களுக்கு எதிரான குற்றங்கள் அதிகமாகும் வாய்ப்புள்ளது.

எனவே, இதுபோன்ற செயலில் ஈடுபடும் நபர்களின் மீது சட்டப்பூர்வமான நடவடிக்கை எடுக்கும் பொருட்டு, மாநில அமலாக்க அலுவலர், (PCPNDT ACT 1994) மற்றும் இயக்குநர், மருத்துவம் மற்றும் ஊரக நலப்பணிகள் அவர்களால் இர்பான் அவர்களுக்கு 21.05.2024 அன்று பாலினத் தேர்வை தடை செய்தல் சட்ட விதிகளை மீறியதற்காக குறிப்பானை சார்பு செய்யப்பட்டுள்ளது.

மேலும், இர்பான் வலையொளி செய்யப்பட்ட ஒளிப்படத்தினை சமூக வலைதளங்களிலிருந்து உடனடியாக நீக்கிட வலையொளி தளத்திற்கும்,Cyber Crime பிரிவிற்கும் 21.05.2024 நாளிட்ட கடிதம் மூலம் அறிவுறுத்தப்பட்டுள்ளது.

கருவின் பாலினம் அறிவதும் அறிவிக்கும் செயலில் ஈடுபடும் நபர்கள் , ஸ்கேன் சென்ட்டர்கள், மருத்துவமனைகள் மீது அரசு கடுமையான சட்ட நடவடிக்கை மேற்கொள்ளும் என்பதை இதன் மூலம் தெரிவித்துக் கொள்ளப்படுகிறது என தமிழ்நாடு மருத்துவம் மற்றும் மக்கள் நல்வாழ்வுத் துறை வெளியிட்டுள்ள செய்தியில் தெரிவிக்கப்பட்டுள்ளது.

யூடியூப் சேனல் மூலம் மிகவும் பிரபலமாக மாறியுள்ள இர்பான் ஏராளமான சிக்கல்களில் சிக்கி ( youtuber irfan ) வருவதும் சிசுவின் பாலினத்தை அறிவதும் அதனை அறிவிப்பதும் குற்றம் என தெரிந்தும் அதனை வீடியோவாக எடுத்து வெளியிட்டுள்ளது தண்டிக்கப்படவேண்டிய குற்றம் என்றும் பலரும் இர்பானின் செயலுக்கு கடும் கண்டனம் தெரிவித்து வருகின்றனர்.