ஆந்திராவில் உள்ள குண்டூர் மாவட்டம் பத்திப்பாடு என்ற கிராமத்தில் டிராக்டர் (tractor) கவிழ்ந்து விபத்துக்குள்ளானதில் 6 பேர் உயிரிழந்துள்ள சம்பவம் சோகத்தை ஏற்படுத்தியுள்ளது.
ஆந்திர பிரதேசம் மாநிலதில், பத்திப்பாடு என்ற கிராமத்தில் உறவினர் இல்ல விழாவில் கலந்து கொள்வதற்காக சுமார் 40 பேர் டிராக்டரில் (tractor) சென்று கொண்டிருந்தனர்.
அப்பொழுது குண்டூர் மாவட்டத்தில் உள்ள வத்திசெருகூர் என்ற பகுதியில் டிராக்டர் சென்றுகொண்டிருந்த போது திடீரென எதிர்பாராத விதமாக டிராக்டர் பள்ளத்தில் கவிழ்ந்து விபத்துக்குள்ளானதில் 6 பேர் பரிதாபமாக உயிரிழந்துள்ளனர்.
மேலும், இந்த விபத்தில் 30க்கும் மேற்பட்டோர் காயம் அடைந்து மருத்துவமனையில் அனுமதிக்கப்பட்டுள்ளனர்.
இதையடுத்து இந்த விபத்து குறித்து காவல் துறையினருக்கு தகவல் தெரிவிக்கப்பட்ட நிலையில், தகவல் அறிந்து வந்த காவல் துறையினர் மீட்பு பணியில் ஈடுபட்டு காயமடைந்தவர்களை மீட்டு சிகிச்சைக்காக மருத்துவமனைக்கு அனுப்பி வைத்தனர்.
இந்நிலையில், விபத்தில் உயிரிழந்தவர்கள் மிக்கிலி நாகம்மா, மாமிடி ஜான்சிராணி, கட்டா நிர்மலா, கரிகாபுடி மேரிம்மா, கரிகாபுடி ரத்னகுமாரி மற்றும் கரிகாபுடி சுஹாசினி என அடையாளம் காணப்பட்டுள்ளனர்.
இந்த விபத்து குறித்து காவல் துறையினர் வழக்கு பதிவு செய்து விசாரணை மேற்கொண்டு வருகின்றனர். மேலும், இந்த விபத்தில் உயிரிழப்புகள் எண்ணிக்கை அதிகரிக்கக்கூடும் என்றும் அஞ்சப்படுகிறது.
உறவினர் இல்ல சுப நிகழ்ச்சிக்கு சென்றபோது ஏற்பட்ட இந்த விபத்து அப்பகுதியில் பெரும் சோகத்தை ஏற்படுத்தியுள்ளது.