நயன்தாரா நடிப்பில் வெளியான மூக்குத்தி அம்மன் படத்தின் இரண்டாம் பாகத்தை தொடங்குவதற்கு முன்பாக ‘கலகலப்பு 3’ படத்தை தொடங்க சுந்தர்.சி முடிவு செய்திருக்கிறார்.
‘கேங்கர்ஸ்’ படத்தைத் தொடர்ந்து நயன்தாரா நடிக்கும் ‘மூக்குத்தி அம்மன் 2’ படத்தை தொடங்க திட்டமிட்டார் சுந்தர்.சி. ஆனால், ஒரு சில காரணங்களால் அப்படம் தொடங்க சிறு காலமாகிறது.
எனவே, அதற்கு முன்பாக கலகலப்பு 3 படத்தை தொடங்க சுந்தர்.சி முடிவு செய்திருக்கிறார் என அவரின் மனைவி குஷ்பு தனது எக்ஸ் தளத்தில் உறுதி செய்திருக்கிறார்.
குஷ்பு மற்றும் கண்ணன் ரவி இணைந்து தயாரிக்கும் ‘கலகலப்பு 3’ படத்தில் யாரெல்லாம் நடிக்கிறார்கள் என்பது குறித்த அறிவிப்பு விரைவில் வெளியிடப்படும் என தெரிவிக்கப்பட்டுள்ளது.
மூக்குத்தி அம்மன் 2 படத்திற்கான கதை, திரைக்கதை அனைத்துமே தயாராக இருக்கிறது. ஆனாலும், கலகலப்பு 3 படத்தை முடித்துவிட்டு தான் மூக்குத்தி அம்மன் 2 படத்தை தொடங்கவுள்ளார் சுந்தர்.சி.
சுந்தர்.சி இயக்கத்தில் மாபெரும் வரவேற்பைப் பெற்ற கலகலப்பு படத்தில் விமல், மிர்ச்சி சிவா, அஞ்சலி, ஓவியா உள்ளிட்ட பலர் நடித்திருந்தார்கள்.
அதன் 2-ம் பாகத்தில் ஜீவா, ஜெய், மிர்ச்சி சிவா, நிகில் கல்ராணி, கத்ரீன் தெரசா உள்ளிட்ட பலர் நடித்திருந்தனர். இரண்டாம் பாகமும் மக்களிடையே நல்ல வரவேற்பைப் பெற்றது.
இதனைத் தொடர்ந்து 3-ம் பாகத்தை உருவாக்க திட்டமிட்டுள்ளார் சுந்தர்.சி. இதிலும் விமல், மிர்ச்சி சிவா நடிக்கவுள்ளதாக தகவல்கள் வெளியாகியுள்ளன.
