ஷாரிக் ஹாசன் ஹீரோவாக நடித்துள்ள நேற்று இந்த நேரம் கிரைம் திரில்லர் படமாக உருவாகியுள்ளது. இந்த திரைப்படத்தின் டிரைலர் வெளியாகி உள்ளது.
“நேற்று இந்த நேரம்” திரைப்படம் கிளாப்-இன் ஃபில்மோடெயின்மென்ட் சார்பில் நவீன் குமார் தயாரிப்பில், சாய் ரோஷன் கே.ஆர். எழுதி, இயக்கியுள்ளார். படத்தின் கதை, திரைக்கதை மற்றும் வசனங்களை நித்தின் ஆதித்யா மற்றும் சாய் ரோஷன் கே.ஆர். ஆகியோர் இணைந்து எழுதியுள்ளனர்.
இதில், பிக்பாஸ் புகழ் ஷாரிக் ஹாசன் கதாநாயகனாக நடித்துள்ளார். மேலும், இந்த படத்தில் ஹரிதா மற்றும் மோனிகா ரமேஷ் என இரண்டு பேர் கதாநாயகிகளாக நடித்துள்ளனர். கெவின் என் இசையமைத்துள்ளார். மேலும், விஷால் மணிவண்ணன் ஒளிப்பதிவு செய்துள்ளார்.
என்.கோவிந்த் படத்தொகுப்பு பணிகளை மேற்கொண்டுள்ளார். படத்தின் பாடல்களை இசையமைப்பாளர் ஜி.வி.பிரகாஷ், அறிவு, ஆதித்யா ஆர்.கே., ரவி ஜி ஆகியோர் பாடியுள்ளனர். படத்தின் இசை உரிமத்தை ஜீ மியூசிக் சவுத் வாங்கியுள்ளது.
கதைப்படி, பார்ட்டி கொண்டாட போன இடத்தில் நண்பர்கள் மர்மமான முறையில் காணாமல் போகின்றனர். அதன் பின்னணியில் நடக்கும் திடுக்கிடும் சம்பவங்களை கிரைம் திரில்லர் பாணியில் உருவாகி இருக்கிறார்கள். இந்த படத்தின் படப்பிடிப்பு ஊட்டி மற்றும் சென்னையில் நடைபெற்றுள்ளது.
நேற்று இந்த நேரம் படத்தின் பர்ஸ்ட் லுக் போஸ்டர் மற்றும் மூன்று பாடல்கள் ஏற்கனவே வெளியாகியுள்ளது. இந்த நிலையில், தற்போது டிரைலரை படக்குழுவினர் வெளியிட்டுள்ள நிலையில், ரசிகர்களிடையே சமூக வலைத்தளத்தில் நல்ல வரவேற்பு கிடைத்துள்ளது. அடுத்த ஆண்டு 2024 ஜனவரி 5ஆம் தேதி திரையரங்குகளில் வெளியாக உள்ளது.
