உலக கோப்பை கிரிக்கெட் தொடரில் நேற்று நடைபெற்ற இந்தியா – தென்னாப்பிரிக்க அணிகளுக்கு இடையிலான லீக் போட்டியில் இந்திய அணி அபார வெற்றி பெற்றுள்ளது.
இந்தியாவில் விறுவிறுப்பாக நடைபெற்று வரும் உலக கோப்பை கிரிக்கெட் தொடரில் நேற்று நடைபெற்ற லீக் போட்டியில் இந்தியா – தென்னாப்பிரிக்க அணிகள் பலப்பரீட்சை நடத்தியது . கொல்கத்தாவில் உள்ள ஈடன் கார்டன் கிரிக்கெட் மைதானத்தில் இந்த போட்டி நடைபெற்றது .
இந்த போட்டியில் தென்னாப்பிரிக்க அணிக்கு எதிராக டாஸ் வென்ற இந்திய அணி முதல் பேட்டிங் செய்ய முடிவு செய்தது . அதன்படி தென்னாப்பிரிக்க அணிக்கு எதிராக அதிக ரன்கள் எடுக்க வேண்டும் என்ற இந்திய அணியின் தொடக்க வீரர்களாக கேப்டன் ரோகித் மற்றும் கில் களமிறங்கினர்.
சிறப்பாக விளையாடிய ரோஹித் ஷர்மா 24 பந்துகளில் 40 ரன்கள் எடுத்த நிலையில் தனது விக்கெட்டை பறிகொடுத்தார். இந்த பக்கம் நிதானமாக விளையாடி வந்த கில் 24 பந்துகளில், 23 ரன்கள் சேர்த்து கேசவ் மஹாராஜ் பந்துவீச்சில் வீழ்ந்தார் .
இதையடுத்து இன்று தனது 35வது பிறந்தநாளை கொண்டாடும் விராட் கோலி தென்னாப்ரிக்கா அணிக்கு எதிராக 67 பந்துகளில் அரைசதம் கடந்து அசத்தினார் . மறுபுறம் அபாரமாக ஆடிய ஸ்ரேயாஸ் அய்யர், 64 பந்துகளில் அரைசதம் கடந்து அசத்தினார் .
தொடர்ந்து அபார ஆட்டத்தை வெளிப்படுத்திய ஸ்ரேயாஸ் 87 பந்துகளில் 77 ரன்கள் சேர்த்த நிலையில் தனது விக்கெட்டை பறிகொடுத்தார் . இதையடுத்து வந்த கே.எல். ராகுல் சொற்ப ரன்களில் வெளியேற அடுத்த வந்த சூர்யகுமார் யாதவ் 13 பந்துகளில் 22 ரன்களை சேர்த்து ஆட்டமிழந்தார்.
ஒருபுறம் இந்திய அணியின் பேட்ஸ்மேன்கள் ஆட்டமிழக்க மறுபக்க நிலைத்து நின்று ஆடிய விராட் கோலி தனது 49வது சதத்தை பூர்த்தி செய்தார். இறுதியில் 50 ஓவர்கள் முடிவில் 326 ரன்களை இந்திய அணி எடுத்திருந்தது .
இதையடுத்து 327 ரன்கள் எடுத்தால் வெற்றி என்ற இலக்கை நோக்கி தென்னாப்பிரிக்க அணி விளையாடியது
உலக்கோப்பை தொடரில் சிறப்பாக ஆடி வந்த குயிண்டன் டி காக் இந்திய அணியின் பந்துவீச்சில் சிக்கி 5 ரங்களில் வெளியேற , கேப்டன் டெம்பா பவுமா 11 ரன்களில் விக்கெட்டை பறிகொடுத்தார்.
பின்னர் வந்த வீரர்கள் அனைவரும் இந்திய அணியின் பந்துவீச்சை சமாளிக்க முடியாமல் அடுத்தடுத்து ஆட்டமிழக்க தென்னாப்பிரிக்க அணி இக்கட்டான சூழலில் தத்தளித்தது . இறுதியில் தென்னாப்பிரிக்கா அணி 27.1 ஓவர்களில் 83 ரன்களுக்கு அனைத்து விக்கெட்டுகளையும் இழந்து தோல்வியை ஒப்புக்கொண்டது .
இதன் மூலம் இந்திய அணி இதுவரை விளையாடிய 8 போட்டிகளிலுமே அபார வெற்றியைப் பதிவு செய்து நடப்பு உலகக் கோப்பைத் தொடரில் அதீத பலம் வாய்ந்த அணியாக உருவெடுத்துள்ளது .
