போலீசை கண்டு விரண்டோடிய என்னை கண்டு இப்போது போலீஸ் கண்டு விரண்டோடுகிறது என முன்னாள் அமைச்சர் செந்தில் பாலாஜி காலரை தூக்கிவிட்டு உலாவரும் நிகழ்வு அரங்கேறிவருகிறது.
ஆவின் நிறுவனத்தில் வேலை வாங்கி தருவதாக கூறி அதிமுக முன்னாள் பால்வளத்துறை அமைச்சர் ராஜேந்திர பாலாஜி சுமார் 3 கோடி ரூபாய் மோசடி செய்ததாக குற்றம் சாட்டப்பட்டது. இதையடுத்து போலீசார் அவரை கைது செய்ய இருந்த நிலையில் திடீரென ராஜேந்திர பாலாஜி தலைமறைவானார்.
எனவே அவரை கைது செய்வதற்காக 6 தனிப்படைகள் அமைக்கப்பட்டு கேரளா, ஆந்திரா உள்ளிட்ட மாநிலங்களில் தனிப்படை காவல் துறையினர் தீவிரமாக தேடி வந்தனர்.
இந்த நிலையில் கடந்த மாதம் 5ம் தேதி கர்நாடக மாநிலம், ஹசன் மாவட்டத்தில் காரில் சென்று கொண்டிருந்தபோது தமிழக தனிப்படை காவல் துறையினர் சுற்றிவளைத்து கைது செய்தனர்.
இதனை தொடர்ந்து ராஜேந்திர பாலாஜி பலத்த பாதுகாப்புடன் அங்கிருந்து விருதுநகருக்கு அழைத்து செல்லப்பட்டு அவரிடம் காவல் துறையினர் கிடுக்கிப்பிடி விசாரணை மேற்கொண்டனர்.
பின்னர் 6ம் தேதி ஸ்ரீவில்லிபுத்தூர் குற்றவியல் நீதிமன்றத்தில் நீதிபதி முன் ஆஜர்படுத்தப்பட்டு திருச்சி மத்திய சிறையில் அடைக்கப்பட்டார். இந்நிலையில், ராஜேந்திர பாலாஜிக்கு உச்ச நீதி மன்றம் நீதிமன்றம் இடைக்கால நிபந்தனை ஜாமீன் வழங்கியதால் விடுதலை செய்யப்பட்டார்.
இந்நிலையில் ராஜேந்திர பாலாஜியை விசாரணைக்கு வருமாறு குற்றப்பிரிவு போலீஸ் சம்மன் அனுப்பி இருந்தது. எனவே விருதுநகர் மாவட்ட குற்றப்பிரிவு போலீஸ் அலுவலகத்தில் முன்னாள் எம்எல்ஏ ராஜவர்மன் மற்றும் வக்கீல்கள் புடை சூழ ராஜேந்திர பாலாஜி ஆஜரானார்.
அப்போது ராஜேந்திர பாலாஜி தனக்கு கொரோனா வைரஸ் தொற்று உள்ளதால், விசாரணையை ஒத்திவைக்குமாறு மனு அளித்தார். இதனால் அதிர்ச்சி அடைந்த போலீசார் அவரிடம் இருந்து சற்று விலகி சென்றனர்.
இதன் பிறகு போலீசார், ‘கொரோனா பாதிப்பு இல்லை’ என சான்று வாங்கி வந்த பிறகு மீண்டும் விசாரணைக்கு வர வேண்டும் எனக் கூறி ராஜேந்திர பாலாஜியை திரும்பவும் அனுப்பினர்.
பொதுவாக தொற்று இருப்பவர்கள் தனிமையில் இருக்க வேண்டும் என சுகாதாரத்துறை வலியுறுத்தி வருகிறது. இந்த சூழலில் ராஜேந்திர பாலாஜி தன்னுடன் பலரை சேர்த்து கொண்டு பொதுவெளியில் நடமாடுவது மக்கள் மத்தியில் அதிர்ச்சியை ஏற்படுத்தி உள்ளது.
அப்படி இருக்கையில், ‘போலீசை கண்டு நான் ஓடினேன். இப்போ போலீஸ் என்ன கண்டு ஓடுது’ ராஜேந்திர பாலாஜி தனது சகாக்களுடன் கூறி தனக்கே உரிய ஸ்டைலில் ஜோக்கடித்து உள்ளார். இதை பார்த்து கொஞ்சம் அடக்கியே வாசிங்க அண்ணாச்சி என்று மூத்த நிர்வாகிகள் அன்போடு ஆலோசனை வழங்கியுள்ளனர்.
