தமிழ்நாடு அரசு பணியாளர் தேர்வாணையம் சார்பில் குரூப் 4 தேர்வு ஜூலை 24ல் நடைபெற உள்ள நிலையில், இன்று ஹால்டிக்கெட் வெளியிடப்பட்டுள்ளது.
தமிழகத்தில் தமிழ்நாடு அரசு பணியாளர் தேர்வாணையம் மூலம் எழுத்து தேர்வு மற்றும் நேர்காணல் நடத்தப்பட்டு பல்வேறு அரசு பணிகளுக்கு பணியாளர்கள் தேர்வு செய்யப்படுகின்றனர். டிஎன்பிஎஸ்சி சார்பில் குரூப் 1 முதல் குரூப் 8 வரையிலான தேர்வுகள் நடத்தப்பட்டு அரசு பணிக்கு பணியாளர்கள் தேர்வு செய்யப்படுகின்றனர்.
முன்னதாக குரூப் 2 முதல்நிலை தேர்வு நடைபெற்ற நிலையில், டிஎன்பிஎஸ்சி குரூப் 4 தேர்வு, ஜூலை 24ம் தேதி காலை 9.30 மணி முதல் 12.30 மணி வரை நடைபெற உள்ளது. இந்த தேர்வு மூலம் தமிழகத்தில் காலியாக உள்ள கிராம நிர்வாக அலுவலர், தட்டச்சர், இளநிலை உதவியாளர், நில அளவையாளர் உள்ளிட்ட 7,382 அரசு பணியிடங்கள் நிரப்பப்பட உள்ளது. இதற்காக மொத்தம் 21 லட்சத்துக்கும் அதிகமானவர்கள் விண்ணப்பித்துள்ளனர்.
இந்த நிலையில் இந்த தேர்வுக்கான ஹால்டிக்கெட் இன்று வெளியிட்டப்பட்டுள்ளது. விண்ணப்பதாரர்கள் www.tnpsc.gov.in என்ற இணையதளம் தங்களுடைய ஒருமுறை பதிவேற்றம் மூலம் விண்ணப்ப எண் மற்றும் பிறந்த தேதியை உள்ளீடு செய்து ஹால்டிக்கெட்டை பதிவிறக்கம் செய்ய முடியும் என தேர்வாணையம் சார்பில் தெரிவிக்கப்பட்டுள்ளது.
பதிவிறக்கம் செய்வது எப்படி?
டிஎன்பிஎஸ்சி இணையதளத்துக்கு சென்று, அங்கு ஹால் டிக்கெட் டவுன்லோட் என்பதை கிளிக் செய்ய வேண்டும். அதன்பிறகு one-time registration என்பதை கிளிக் செய்து Registered User என்பதை கிளிக் செய்ய வேண்டும். அதன்பிறகு பயனர் ஐடி (Login ID) மற்றும் பாஸ்வேர்டு கொடுத்து கேப்சாவை சரியாக டைப் செய்து டிஎன்பிஎஸ்சி குரூப் 4 ஹால்டிக்கெட் என்பதை கிளிக் செய்து விண்ணப்ப எண் மற்றும் பிறந்த தேதியை உள்ளீடு செய்தால் ஹால்டிக்கெட் தோன்றும். அதில் உள்ள விபரங்களை சரிபார்த்து பதிவிறக்கி கொள்ள வேண்டும்.
