அமெரிக்காவில், குற்றவாளி ஒருவருக்கு உலகிலேயே முதல் முறையாக ‘நைட்ரஜன் வாயு’ செலுத்தி மரண தண்டனை நிறைவேற்றப்பட்டுள்ளது.
அமெரிக்காவின் அலபாமா மாகாணத்தை சேர்ந்த சார்லஸ் சென்னட். இவர் மதபோதகரான இவரது மனைவி எலிசபெத்க்கு வயது 45. இந்நிலையில், கடந்த 1988ம் ஆண்டு மார்ச் 18ம் தேதி வீட்டில் மர்மமான முறையில் எலிசபெத் உயிரிழந்து கிடந்தார்.
அவரது மார்பு மற்றும் கழுத்து பகுதியில் கத்தியால் குத்தப்பட்ட காயங்களுடன் ரத்த வெள்ளத்தில் உயிரிழந்து கிடந்தார். இந்த சம்பவம் தொடர்பாக கொலை வழக்குப்பதிவு செய்த காவல் துறையினர் விசாரணை நடத்தி வந்தனர்.
இந்த சம்பவம் தொடர்பான விசாரணையில், கடன் தொல்லையால் பாதிக்கப்பட்டிருந்த சார்லஸ் தனது மனைவி பெயரில் இருந்த காப்பீட்டு பணத்தை வாங்குவதற்காக அவரை கொலை செய்ய திட்டமிட்டுள்ளார்.
இதற்காக கென்னத் யூஜின் ஸ்மித் மற்றும் ஜான் பாரஸ்ட் பார்க்கர் ஆகிய இருவருக்கும் தலா ஆயிரம் அமெரிக்க டாலர்கள் கொடுத்து எலிசபெத்தை கொல்ல திட்டமிட்டுள்ளார்.
அந்த திட்டத்தின் படி, ஸ்மித் மற்றும் அவரது கூட்டாளி பார்க்கரும் எலிசபெத்தை கொலை செய்துள்ளனர்.
இந்த கொலை சம்பவம் காவல் துறையினரின் விசாரணையில் தெரியவர எலிசபெத்தின் கணவர் சார்லசை கைது செய்ய முயற்சித்தனர்.
ஆனால், விசாரணை தன்பக்கம் திரும்புவதை உணர்ந்த சார்லஸ் காவல் துறையினர் அவரை கைது செய்வதற்குள் தற்கொலை செய்து கொண்டார்.
இந்நிலையில், எலிசபெத்தை கொலை செய்த ஸ்மித் மற்றும் பார்க்கரை காவல் துறையினர் கைது செய்தனர். கைது செய்யப்பட்ட இருவருக்கும் மரண தண்டனை விதிக்கப்பட்டது.
அதையடுத்து கடந்த 2010ம் ஆண்டு இந்த கொலையில் முக்கிய குற்றவாளியான ஜான் பாரஸ்ட் பார்க்கருக்கு மரண தண்டனை நிறைவேற்றப்பட்டது.
அதனைத் தொடர்ந்து மற்றொரு குற்றவாளியான கென்னத் யூஜின் ஸ்மித்திற்கு கடந்த 2022ம் ஆண்டு மரண தண்டனை நிறைவேற்ற திட்டமிடப்பட்டிருந்தது.
அவருக்கு விஷ ஊசி செலுத்தி மரண தண்டனை நிறைவேற்ற திட்டமிடப்பட்டிருந்த நிலையில் அந்த முயற்சி தோல்வியில் முடிந்தது.
அதாவது, குற்றவாளி ஸ்மித்தின் உடலில் ஊசி மூலம் விஷம் செலுத்தி மரண தண்டனை நிறைவேற்ற திட்டமிட்டிருந்த நிலையில், அதிகாரிகளின் கவனக்குறைவால் உடலில் மருந்து செல்லும் இணைப்பு சரியாக அமைக்கப்படவில்லை.
இதனால், மரண தண்டனை நிறைவேற்றம் தடைபட்டது. அதன் பின்னர், தனக்கு வழங்கப்பட்ட தண்டனையை குறைக்கும்படி ஸ்மித் கோர்ட்டில் வழக்கு தொடர்ந்தார்.
இதனிடையே, ஸ்மித்திற்கு வழங்கப்பட்ட மரண தண்டனையை சுப்ரீம் கோர்ட்டு உறுதி செய்தது.
இதையடுத்து, நைட்ரஜன் வாயு செலுத்தி குற்றவாளிக்கு மரண தண்டனை விதிக்கப்படும் என அலபாமா மாகாண சிறைத்துறை தெரிவித்தது.
இந்நிலையில், குற்றவாளி ஸ்மித்திற்கு இன்று நைட்ரஜன் வாயு செலுத்தி மரண தண்டனை நிறைவேற்றப்பட்டுள்ளது.
இன்று காலை 8 மணியளவில் குற்றவாளி ஸ்மித்தின் கைகள் கட்டப்பட்டு முகக்கவசம் அணிவிக்கப்பட்டு சுவாச குழாயில் தூய்மையான நைட்ரஜன் வாயு செலுத்தப்பட்டது.
நைட்ரஜன் வாயுவை சுவாசித்த ஒரு சில நிமிடங்களில் மூச்சுத்திணறல் ஏற்பட்டு உயிர் பிரிந்ததாக சிறைத்துறை தெரிவித்துள்ளது.
இதன் மூலம் உலகிலேயே முதல்முறையாக நைட்ரஜன் வாயுசெலுத்தி குற்றவாளிக்கு மரண தண்டனை நிறைவேற்றப்பட்டுள்ளது.
