தெற்கு ரயில்வே அறிமுகம் செஞ்ச புதுவசதி…இனிமே வேற லெவல்!

UTS மொபைல் ஆப் மூலம் பேப்பர்லெஸ் டிக்கெட்கள் பெறும் வசதி அறிமுகம் செய்யப்பட்டு ரயில் பயணிகள் மத்தியில் மிகுந்த வரவேற்பை பெற்று வருகிறது. இந்நிலையில் இந்த வசதியை அடுத்தகட்டத்திற்கு கொண்டு செல்லும் வகையில் சூப்பரான ஓர் ஏற்பாட்டை தெற்கு ரயில்வே செய்திருப்பது மகிழ்ச்சியூட்டும் விஷயமாக பார்க்கப்படுகிறது.

முன்பதிவில்லா டிக்கெட்களை பெறுவதற்கு யுடிஎஸ் மொபைல் ஆப்
அனைத்து ரயில் நிலையங்களிலும் பயன்படுத்தும் வகையில் விரிவாக்கம்
தெற்கு ரயில்வே வெளியிட்ட அறிவிப்பால் ரயில் பயணிகள் மகிழ்ச்சி

இந்தியாவின் மிகப்பெரிய பொதுத்துறை நிறுவனங்களில் ஒன்றாக ரயில்வே திகழ்கிறது. பல லட்சம் ஊழியர்கள், பல்லாயிரக்கணக்கில் சிக்கலான ரயில் தண்டவாளங்கள், தினசரி பல கோடி பேர் பயணம், கோடிக்கணக்கில் வருவாய் என முக்கியத்துவம் வாய்ந்த விஷயங்கள் ஏராளமாக இருக்கின்றன. தற்போதைய டிஜிட்டல் யுகத்தில் ரயில்வே துறையின் பல்வேறு அம்சங்கள் நவீனப்படுத்தப்பட்டு வருகின்றன.

டிஜிட்டல் ரயில் டிக்கெட்:

அந்த வகையில் ஐஆர்சிடிசி (IRCTC) இணையதளமும், யுடிஎஸ் (UTS) மொபைல் ஆப்பும் முக்கியமானவை. ரயில் டிக்கெட்களை முன்பதிவு செய்ய ஐஆர்சிடிசி இணையதளத்தை பயன்படுத்தலாம். முன்பதிவு இல்லாத டிக்கெட்களை பெற யுடிஎஸ் மொபைல் ஆப்பை பயன்படுத்தலாம். இவை அனைத்தும் டிஜிட்டல் டிக்கெட்களாக பெறப்படும். மொபைல் போன் வழியாகவே டிக்கெட் பரிசோதகர்களிடம் காண்பித்து பயணம் செய்யலாம்.

யுடிஎஸ் மொபைல் ஆப்

இதில் யுடிஎஸ் மொபைல் ஆப் சேவை படிப்படியாக விரிவுபடுத்தப்பட்டு வருகிறது. முதலில் குறிப்பிட்ட ரயில் நிலையங்களில் மட்டும் பயன்பாட்டிற்கு வந்தது. தற்போது தென்னிந்தியாவின் அனைத்து ரயில் நிலையங்களிலும் பயன்படுத்தும் வகையில் அப்டேட் செய்யப்பட்டுள்ளது. இதனை தெற்கு ரயில்வே அதிகாரப்பூர்வமாக உறுதி செய்துள்ளது.

இந்திய ரயில்வே ஏற்பாடு

யுடிஎஸ் மொபைல் ஆப்பை பொறுத்தவரை இந்திய ரயில்வே மற்றும் CRIS எனப்படும் ரயில்வே தகவல் அமைப்பு மையம் ஆகியவை இணைந்து தயாரித்துள்ளன. இது ஆண்ட்ராய்டு, விண்டோஸ், ஐஓஎஸ் என பல்வேறு வெர்ஷனில் செயல்படும் வண்ணம் உருவாக்கப்பட்டுள்ளது. முன்பதிவில்லா ரயில் பயண டிக்கெட் மட்டுமின்றி, பிளாட்பார்ம் டிக்கெட், சீசன் டிக்கெட் ஆகியவற்றையும் பெறலாம்.

ஜாலியான பயணம்

ரயில் நிலையங்களுக்கு அருகில் வசிக்கக்கூடிய மக்கள் எளிதாக பயணம் மேற்கொள்ளும் வகையில் யுடிஎஸ் மொபைல் ஆப்பை பயன்படுத்திக் கொள்ளலாம். இந்த மொபைல் ஆப் மூலம் முன்பதிவில்லாத டிக்கெட்களை பெறுவதன் மூலம் பேப்பர் பயன்பாடு குறைவது மட்டுமின்றி, சிரமமில்லாத ரயில் பயணத்தை மேற்கொள்ள முடியும்.

யுடிஎஸ் மொபைல் ஆப் மூலம் பேப்பர்லெஸ் டிக்கெட் எப்படி பெறுவது?

முதலில் ஆப்பை டவுன்லோடு செய்து சுய விவரங்களை அளிக்க வேண்டும். அதன்பிறகு யூசர் பெயர், பாஸ்வேர்டு ஆகியவற்றை கொண்டு லாகின் செய்ய வேண்டும்.

ஆப்பின் உள்ளே சென்றதும் Normal Booking, Quick Booking, Platform Booking, Season Booking, QR Booking எனப் பல சேவைகள் இருக்கும்.

தினசரி பயண டிக்கெட் பெறுவதற்கு Normal Booking அல்லது Quick Booking சேவையை பயன்படுத்தலாம்.

பிளாட்பார்ம் டிக்கெட் பெறுவதற்கு Platform Booking ஆப்ஷனை பயன்படுத்த வேண்டும்.

Normal Booking சேவைக்குள் சென்றதும் Book and Travel ஆப்ஷனை தேர்வு செய்து புறப்படும் ரயில் நிலையம், சென்றடையும் ரயில் நிலையம் ஆகியவற்றை தேர்வு செய்ய வேண்டும்.

எத்தனை பயணிகள் பயணிக்கிறீர்கள் என்பதை தேர்வு செய்து, அதற்குரிய கட்டணத்தை செலுத்த வேண்டும்.

கட்டணம் செலுத்தியதும் டிக்கெட் தயாராகி மொபைல் ஸ்கிரீனில் காண்பிக்கப்படும். இதனை ரயில் நிலையங்களிலும், டிக்கெட் பரிசோதகர்களிடமும் காண்பித்து பயணத்தை மேற்கொள்ளலாம்.