ஐ தமிழ் நேயர்களுக்கு மகிழ்வான வணக்கம்.
“புலால் உண்பதில்லை. ஆடுகள் ,கோழிகள் வளர்ப்பதில்லை. ரசாயன உரங்கள் பயன்படுத்துவதில்லை. வம்பு,வழக்கு என காவல் நிலையம் சென்றதில்லை.இறை பக்தியோடு நிறைவான வாழ்க்கை வாழ்கிறார்கள்.” – இதற்கெல்லாம் காரணம் ஸ்ரீ காமாட்சி அம்மன் உடனான ஸ்ரீ கயிலாசநாதர் திருக்கோயில்தான் என்கிறார்கள் அவ்வூர் மக்கள்.
காஞ்சியில் காமாட்சி எப்படி இரண்டு திருக்கரங்களோடு அழகுற அமைந்து அருளாட்சி செய்கிறாளோ…..அதே போன்ற அமைப்பில் இவ்வூரிலும் காமாட்சி காட்சி தருவதுதான் வியப்பான விந்தை !
இப்படியோர் ஆச்சர்யமான கிராமத்திற்கு உங்களை அழைத்து செல்வதில் ஐ தமிழ் தாய் பெருமிதம் கொள்கிறது.
திருவாரூர் மாவட்டம், பூந்தோட்டத்துக்கு அருகில் உள்ளது ஆண்டார்பந்தி என்ற சிறிய கிராமம். அப்பர் பெருமான் தொடங்கி, காஞ்சி மகாபெரியவர் வரை பல அருளாளர்கள் இங்கு வந்து தங்கி, இறைவனை தரிசித்து , ஊர் மக்களுக்கு ஆசி வழங்கியிருக்கிறார்கள்.
ஊர் எல்லையில் நுழைந்தவுடனேயே பச்சை பசேலென ஓங்கி வளர்ந்த பாக்கு ,தேக்கு, மா, பலா,வாழை, தென்னையென பசுமரங்கள் நம் மனதை இதமாக்கி வரவேற்கின்றன. இந்த ஊர் “ஆண்டார்பந்தி” என பெயர் பெற்றமைக்கு காரணம் அறிவோமா….
கிராம தலைவர் சிவ. பழனி சொல்கிறார். ” ஒரு காலத்தில் தாளாத பஞ்சத்தில் இப்பகுதி மக்கள் எல்லோரும் தவித்திருந்த வேளையில், அப்பர் பெருமானும் ,சம்பந்த பெருமானும், திருவீழிமிழலையில் ஈசனிடம் படிக்காசுகள் பெற்று, அய்யன்பேட்டையில் மளிகைப் பொருள்களை வாங்கி,இங்கு வந்து இங்குள்ளோரை வைத்து சமைத்து, பந்தி பரிமாறினர் என்பது வரலாறு. அதனால் இவ்வூர் ஆண்டார்பந்தி என்றானது.
ஆண்டார் என்றால் அடியார்கள் என்று பொருள். அருளால் நம்மை ஆள்பவர்கள்தானே அடியார்கள். அன்று சமையல் பணியை மேற்கொண்டதாலோ, என்னமோ, இன்றும் இங்குள்ள 135 சைவப் பிள்ளைமார்கள் குடும்பமும் விருந்து படைக்கும் தொழிலையே மேற்கொள்கிறார்கள்.
இவர்களின் சமையல் கலை இன்றளவும் உலகப் பிரசித்தி பெற்றுள்ளது. அப்பர் பெருமான் இவ்வூரைவிட்டு செல்லும்போது, பானகக் கரைசலில் மீதமான எலுமிச்சை விதைகளை ஒவ்வொருவர் வீட்டுக்கொல்லையிலும் தெளித்துவிட்டுப் போனாராம். அதில் சிதறிய விதைகள் வளர்ந்து இந்த ஊரே எலுமிச்சைத் தோட்டமாக மாறியது.
ஒவ்வொரு எலுமிச்சை மரத்திலும் பூ, பிஞ்சு, காய் கனியென இருக்கும்.அவை ஆண்டு முழுவதும் காய்க்கும் .அது இன்றளவும் செழித்து, இப்போதும் நாளொன்றுக்கு ஒன்றரை லட்சம் எலுமிச்சை பழங்கள், இங்கிருந்து விற்பனைக்குச் செல்கின்றன.
இங்கு காலம் காலமாக இயற்கை விவசாயமே செய்யப்படுகிறது. எல்லோர் வீட்டுக்கொல்லையிலும் காய்கறிகள் விளைவதாலும் ,அவற்றையே சமைத்து உண்பதாலும், பெரும்பாலும் ஆஸ்பத்திரி,டாக்டர் ,வைத்தியம் என்று யாரும் செல்வதில்லை.
முன்னோர்கள் வகுத்துக்கொடுத்த பாதையிலேயே இதுநாள்வரை பயணிக்கிறோம். எதிர்க்காலத்திலும் இதுவே தொடரவேண்டும். அதற்கு இந்த காமாட்சி கயிலாசநாதர் அருள்புரியவேண்டும் ” என்றார்.
இதையும் படிங்க : வரலாற்று விவாதங்கள் கொண்ட வீரசிகாமணி குடைவரை கோவில்!
“இந்த ஊருக்கே பெருமை சேர்த்த மிக முக்கியமான விஷயம் ஸ்ரீகாமாட்சி உடனுறை கயிலாசநாதர் கோயில்தான். காஞ்சி பெரியவர் இவ்வூருக்கு அருகே விஜயம் செய்தபோது, ‘அருகிலிருந்து காமாட்சி அன்னை என்னை அழைக்கிறாள்’ என்று கூறி காமாட்சி இருக்குமிடம் அறிந்து , இங்கு வந்து சில நாள்கள் தங்கியிருந்து அன்னையை வழிபட்டு நெக்குருகினாராம். இங்கு கோயில் அருகிலுள்ள அரசலாற்றுக் கரையில், அவரே தர்ப்பணம் கொடுத்து வழிபட்டதால் இன்றும் பித்ரு வழிபாட்டு தலமாகவும் இது விளங்குகிறது.
இங்குள்ள அம்பாளை ஆராதிக்க மங்கல வாழ்வு நிலைக்கும் என்பது நம்பிக்கை. இங்குள்ள கயிலாசநாதரோ சகல காரியங்களிலும் வெற்றி அருளும் வரப்பிரசாதியாவார்.
1500 ஆண்டுகளைக் கடந்த இந்த ஆலயம் காலப்போக்கில் சிதலமாகிவிட, அடியார்களும் ஊர் பொதுமக்களும் இணைந்து ஆலய திருப்பணிச் செய்ய தொடங்கினர். ஆலயமும் எழும்ப, ஈசனின் திருவுளப்படி இவ்வாலய குடமுழுக்குக்கான தேதியும் 23-8-24 என்று முடிவு செய்யப்பட்டது.
ஆனால் சோதனை போலும்.. இந்த ஆலயத்தின் சில பணிகள் நிறைவுறாமல் நின்று தத்தளிக்கிறது. இதிபற்றி பிச்சுமணி குருக்கள் பேசியபோது, “ஈசனுக்கு ஒன்று ஈந்தால், அது உங்கள் ஏழேழு தலைமுறையையும் செழித்து வாழ வைக்கும் ” என்பது திருமுறைகள் சொல்லும் பாடம்.
தொகை சிறிதாயினும் உங்கள் பங்கு சிவப்பணியில் சேரட்டும் என்று வேண்டுகிறோம். காமாட்சி கடாட்சம் உங்கள் குடும்பத்தை கவசம்போல் பாதுகாக்கும் ” என்றார்.
மீண்டும் ஓர் அற்புதமான தலத்தில் சந்திக்கும்வரை உங்களிடமிருந்து விடைபெறுவது உங்கள்
ஐ தமிழ் !