நடிகர் அஜீத்குமார் பிறந்தநாளை முன்னிட்டு கைகளைப் பயன்படுத்தாமல் “தல” யை தலையால் வரைந்து ஓவிய ஆசிரியர் அசத்தி உள்ளார்.
கள்ளக்குறிச்சி மாவட்டம் திருக்கோவிலூர் அடுத்த மணலூர்பேட்டை சேர்ந்த ஓவியர் சு.செல்வம் அவர்கள் திரைப்பட நடிகர் அஜித்குமார் பிறந்தநாள் முன்னிட்டு பிறந்தநாள் வாழ்த்து கூறும் விதமாக கைகள் பயன்படுத்தாமல் தன்னுடைய தலையால் தல (அஜித்) படத்தை வரைந்தார்.
இன்றைய தமிழ் சினிமாவில் ரசிகர்களின் மனதை வென்ற முன்னணி நட்சத்திரங்களில் ஒருவர் தான் நடிகர் அஜித் குமார். தனது இளமைப் பருவத்திலிருந்தே ரேஸ் கார், பைக் ஓட்டுவதில் ஆர்வம் காட்டி வந்த அஜித் மும்பை, சென்னை, தில்லி போன்ற இடங்களில் நடந்த கார் ரேஸ்களில் கலந்து கொண்டு வெற்றிப் பெற்றுள்ளார்.
மேலும் சர்வதேச அரங்கில் ரேஸ்களில் பங்கேற்கும் இந்தியர்களில் ஒருவர் என்றும் ஃபார்முலா சாம்பியன் போட்டியில் வென்ற ஒரே இந்திய நடிகரென்ற பெருமையையும் பெற்றவர். எந்தவொரு சினிமாப் பின்னணியும் இல்லாமல், தமிழ் திரையுலகில் நுழைந்து, தனது கடின உழைப்பால் முன்னேறி, தனது நடிப்பால் தனக்கென ரசிகர்கள் கூட்டத்தை உருவாக்கியுள்ளார்.
அது மட்டும் இன்றி சிறந்த மனிதர், ரசிகர்கள் மனதில் ‘தல’ என்று அன்போடு நிலைத்திருப்பவர் அஜித் குமார் ஆவார். அதனால் தல என்பதை குறிக்கும் விதமாக ஓவியர் செல்வம் அவர்கள் கைகள் பயன்படுத்தாமல்! சிறுகம்பியில் வளையம் மாதிரி செய்து அதில் பிரஷ் வைத்துக் கொண்டு தன்னுடைய தலையில் மாட்டிக் கொண்டு பின், தன் தலையை அசைத்து அசைத்து நீர் வண்ணத்தில் பிரஷ்ஷால் தொட்டு 15 நிமிடங்களில் ‘தல’ படத்தை தலையால் வரைந்து அசத்தி பிறந்தநாள் வாழ்த்துக்கள் கூறினார்.
இந்த ஓவியத்தை பார்த்த தல அஜித் ரசிகர்கள் தல உருவத்தை தலையாலேயே வரைந்தது அச்சரியமாக உள்ளது என்று ஓவியர் செல்வத்தின் திறமையை பாராட்டி உள்ளனர்.
