அதிக மாணவர்கள் படிக்கும் அரசுப் பள்ளிகளில், சுழற்சி முறையில் வகுப்புகளை நடத்த வேண்டும் என, தமிழ்நாடு அரசு ஊழியர்கள் மற்றும் ஆசிரியர்கள் நல கூட்டமைப்பு வலியுறுத்தி உள்ளது.
தமிழகத்தில், கொரோனா வைரஸ் மற்றும் ஒமைக்ரான் வைரஸ் காரணமாக, 1 ஆம் வகுப்பு முதல் 8 ஆம் வகுப்பு வரையிலான மாணவர்களுக்கு, இம்மாத இறுதி வரை முதலில் விடுமுறை அறிவிக்கப்பட்டு இருந்தது. இதைத் தொடர்ந்து, பொதுத் தேர்வு எழுத உள்ள மாணவர்களுக்கும் விடுமுறை அளிக்கப்பட்டது. எனினும் ஆன்லைன் முறையில் பாடங்கள் நடத்தப்பட்டு வருகின்றன.
தமிழகத்தில் குறைந்து வரும் கொரோனா பாதிப்பு காரணமாக, நாளை முதல், 1 ஆம் வகுப்பு முதல் 12 ஆம் வகுப்பு வரையிலான மாணவர்களுக்கு, கொரோனா தடுப்பு நடவடிக்கைகளை பின்பற்றி, பள்ளிகள் மீண்டும் திறக்கப்படும் என, முதலமைச்சர் மு.க.ஸ்டாலின் அண்மையில் உத்தரவிட்டார். இதற்கான ஏற்பாடுகளை பள்ளிக் கல்வித் துறை அதிகாரிகள் செய்து வருகின்றனர்.
இந்நிலையில், அதிக மாணவர்கள் படிக்கும் அரசுப் பள்ளிகளில், சுழற்சி முறையில் வகுப்புகளை நடத்த வேண்டும் என, தமிழ்நாடு அரசு ஊழியர்கள் மற்றும் ஆசிரியர்கள் நல கூட்டமைப்பு வலியுறுத்தி உள்ளது.
இது குறித்து தெரிவித்த தமிழ்நாடு அரசு ஊழியர்கள் மற்றும் ஆசிரியர்கள் நல கூட்டமைப்பு தலைவர் அருணன்,
தமிழகத்தில் வரும் பிப்ரவரி மாதம் 1 ஆம் தேதி முதல் பள்ளி திறப்பது வரவேற்கக்கூடியது. பல அரசுப் பள்ளிகளில் அதிகமான மாணவர்கள் படிப்பதால், வகுப்பறை பற்றாக்குறை உள்ளது. இந்த வகுப்பறைகளில் சமூக இடைவெளியை பின்பற்றுவது சிரமமாக இருக்கும். அதிகமான மாணவர்கள் படிக்கக் கூடிய அரசு பள்ளிகளில் மட்டும் சுழற்சி முறையில் வகுப்புகளை நடத்துவதற்கு அரசு உத்தரவிட வேண்டும் என்று கூறினார்.
