சென்னையைச் சேர்ந்த பிரக்ஞானந்தா என்ற 16 வயது சிறுவன் உலக சாம்பியன் மெக்னஸ் கார்ல்சனை தோற்கடித்து சாதனை படைத்துள்ளார்.
செஸ் விளையாட்டில் அசுர வளர்ச்சி பெற்று வரும் சென்னையைச் சேர்ந்த பிரக்ஞானந்தா கடந்து வந்த பாதை என்ன? விரிவாக பார்க்கலாம்……
சென்னையைச் சேர்ந்தவர்கள் ரமேஷ்பாபு மற்றும் நாகலட்சுமி தம்பதி. இவர்களது 16 வயதான மகன் பிரக்ஞானந்தா. இவரும் இவருடைய அக்கா வைஷாலியும் சிறு வயதில் அதிகமாக தொலைக்காட்சியை பார்த்து வந்ததால் இவர்களின் கவனத்தை மாற்ற நினைத்த தீவிர செஸ் ரசிகரான இவர்களுடைய தந்தை ரமேஷ் பாபு தன்னுடைய மகள் வைஷாலியை முதலில் செஸ் பயிற்சியில் சேர்த்துள்ளார்.
அக்கா வைஷாலி செஸ் பயிற்சி வகுப்பிற்கு செல்வதை பார்த்த பிரக்ஞானந்தாவிற்கு சிறுவயது முதல் செஸ் விளையாட்டில் ஆர்வம் ஏற்பட்டுள்ளது. இதனால் அக்காவிடம் இருந்து நான்கு வயது முதல் செஸ் கற்று கொள்ள தொடங்கிய பிரக்ஞானந்தா 5 வயது முதல் செஸ் போட்டிகளில் பங்கேற்று வந்தார்.
தன்னுடைய 7 வயதில் 8 வயதுக்குட்பட்டோருக்கான உலக சாமியன்ஷிப் பட்டத்தை வென்ற இவர் அதன்பின்னர் 10 வயதில் சர்வதேச செஸ் மாஸ்டர் பட்டத்தை வென்றார். இதன்மூலம் இளம் வயதில் சர்வதேச செஸ் மாஸ்டர் பட்டத்தை வென்று அசத்தினார்.
இதைத் தொடர்ந்து 12 வருடம் 10 மாதம் 13 நாட்களில் கிராண்ட்மாஸ்டர் பட்டம் வென்று அசத்தினார். இதன்பின்னர் 2019 ஆண்டு நடைபெற்ற 18 வயதுக்கு உட்பட்டோருக்கான உலக யூத் செஸ் சாம்பியன்ஷிப் போட்டியில் தனது 14 வயதில் பிரக்ஞானந்தா சாம்பியன் பட்டத்தை வென்று அசத்தினார். அத்துடன் டிசம்பர் 2019ல் செஸ் தரவரிசையில் 2600 புள்ளிகளை கடந்த முதல் இந்திய வீரர் என்ற சாதனையையும் பிரக்ஞானந்தா படைத்திருந்தார்.
ஒருகட்டத்தில் இவர் மற்றும் இவருடைய அக்கா வைஷாலியின் செஸ் பயிற்சிக்கு பெற்றோர்களால் பணம் செலுத்த முடியாத சூழல் உருவாகியது. அப்போது ஒரு தொழிலதிபர் ஒருவர் அவர்களுக்கு உதவி செய்தார். அதேபோல் பிரக்ஞானந்தாவின் பள்ளி அவருக்கான பள்ளி கட்டணம் மற்றும் வருகை பதிவு ஆகியவற்றை தளர்த்தியது.
இதனால் எந்தவித சிக்கலும் இல்லாமல். திநகரிலுள்ள பிரபல செஸ் பயிற்சியாளார் ஆர்.பி.ரமேஷிடம் பிரக்ஞானந்தா தொடர்ந்து செஸ் பயிற்சி பெற்று வருகிறார்
இந்த நிலையில் தற்போது தன்னுடைய 16 வயதில் உலக சாம்பியன் மெக்ன்ஸ் கார்ல்சனை அசுர வளர்ச்சி கண்டுள்ளார் பிரக்ஞானந்தா.
ஏர்திங்ஸ் என்ற ஆன்லைன் செஸ் சாம்பியன்ஷிப் தொடர் தற்போது நடைபெற்று வருகிறது. இந்தத் தொடரில் இந்தியா சார்பில் பங்கேற்ற தமிழ்நாட்டைச் சேர்ந்த 16 வயதான பிரக்ஞானந்தா 8ஆவது சுற்றில் உலகின் நம்பர் ஒன் செஸ் வீரரான மெக்னஸ் கார்ல்சனை எதிர்த்து விளையாடினார்.
இந்தப் போட்டியில் ஆரம்பம் முதலே சிறப்பாக விளையாடிய பிரக்ஞானந்தா கருப்பு நிற காய்களில் நன்றாக நகர்த்தல்களை மேற்கொண்டார். டார்ஸ்ச் வகை கேமை பயன்படுத்திய பிரக்ஞானந்தா வெறும் 19 நகர்த்தலில் உலகின் நம்பர் ஒன் வீரரான மெக்னஸ் கார்ல்செனை வீழ்த்தி அசத்தினார். இதன்மூலம் முதல் முறையாக உலக சாம்பியன் மெக்னஸ் கார்ல்சனை வீழ்த்தி தமிழகத்திற்கு மட்டும் அல்ல இந்தியாவுக்கும் பெருமை சேர்த்துள்ளார்.
