அ.தி.மு.க பொதுச்செயலாளர் எடப்பாடி பழனிசாமி ஜனவரி 30 மற்றும் 31 ஆகிய தேதிகளில் கொடநாடு (Kodanad case) கொலை, கொள்ளை வழக்கில்,
சாட்சியங்களை பதிவு செய்வதற்காக மாஸ்டர் நீதிமன்றத்தில் ஆஜராக வேண்டும் என சென்னை உயர் நீதிமன்றம் உத்தரவிட்டுள்ளது.
கடந்த 2019-ம் ஆண்டு, கொடநாடு (Kodanad case) கொலை, கொள்ளை வழக்கில் தன்னை தொடர்புபடுத்தி வீடியோ வெளியிட்ட டெல்லியைச் சேர்ந்த பத்திரிகையாளர் மேத்யூ சாமுவேல்,
இந்த வழக்கில் குற்றம்சாட்டப்பட்டுள்ள சயான் மற்றும் வாளையார் மனோஜ் ஆகியோருக்கு எதிராக எடப்பாடி பழனிசாமி, 1.1 கோடி ரூபாய் மான நஷ்ட ஈடு கோரி, சென்னை உயர் நீதிமன்றத்தில் வழக்கு தொடர்ந்திருந்தார்.
இந்த வழக்கில் சாட்சியங்களை பதிவு செய்வதற்காக வழக்கினை மாஸ்டர் நீதிமன்றத்திற்கு அனுப்பி வைத்து, சென்னை உயர் நீதிமன்றம் உத்தரவிட்டிருந்தது.
உயர் நீதிமன்ற வளாகத்தில் உள்ள மாஸ்டர் நீதிமன்றத்தில் நேரில் ஆஜராகி சாட்சியம் அளிக்க இயலாது என்று கூறிய எடப்பாடி பழனிசாமி,
தமது வீட்டில் சாட்சியத்தை பதிவுசெய்ய வழக்கறிஞர் ஆணையரை நியமிக்க வேண்டுமெனக் கோரி, சென்னை உயர் நீதிமன்றத்தில் மனுத்தாக்கல் செய்திருந்தார்.
இந்த மனுவை ஏற்ற உயர் நீதிமன்றம், நேரில் ஆஜராகி சாட்சியம் அளிக்க எடப்பாடி பழனிசாமிக்கு விலக்கு அளித்தது.
இதையும் படிங்க : https://itamiltv.com/pregnant-job-agency-of-bihar-scam-shock-the-nation-scam-if-you-get-pregnant-you-will-lose-lakhs-of-money-tamil-news/
மேலும், இந்த நடைமுறையை அவரது வீட்டில் மேற்கொள்வதற்காக வழக்கறிஞர் ஆணையராக எஸ்.கார்த்திகை பாலனை நியமித்தது.
உயர் நீதிமன்றத்தின் இந்த உத்தரவை எதிர்த்து சாமுவேல் மேத்யூ தாக்கல் செய்த மேல்முறையீட்டு மனு, நீதிபதிகள் ஆர்.மகாதேவன், முகமது ஷஃபிக் ஆகியோர் அடங்கிய அமர்வில் கடந்தமுறை விசாரணைக்கு வந்தது.
அப்போது, எடப்பாடி பழனிசாமி நேரில் ஆஜராவதில் இருந்து விலக்கு அளிக்க வேண்டும் எனக் கூறக் கூடிய காரணங்கள் ஏற்றுக் கொள்ளும்படியாக இல்லை என நீதிபதிகள் தெரிவித்தனர்.
மேலும், சட்டத்தின் முன் அனைவரும் சமம் எனக் கூறிய நீதிபதிகள், உரிய அறிவுறுத்தல் வழங்கும்படி எடப்பாடி பழனிசாமி தரப்பு வழக்கறிஞருக்கு உத்தரவிட்டிருந்தனர்.
இந்த வழக்கு இன்று மீண்டும் விசாரணைக்கு வந்தது. இதுகுறித்து எடப்பாடி பழனிசாமியிடம் அறிவுறுத்தியுள்ளதாக அவரது வழக்கறிஞர்கள் நீதிபதிகளிடம் தெரிவித்தனர்.
அதன்படி, எடப்பாடி பழனிசாமி அவர்கள் பொங்கல் விடுமுறை மற்றும் சட்டப்பேரவை நடைபெறவுள்ளதால் அதன் பின்னர், ஆஜராகத் தயாராக இருப்பதாகவும் விளக்கம் அளிக்கப்பட்டது.
அதன் பின்னர், நீதிபதிகள் பிறப்பித்த உத்தரவில் ஜனவரி 30, 31 ஆகிய இரண்டு நாள்கள் சென்னை உயர் நீதிமன்ற வளாகத்தில் உள்ள மாஸ்டர் நீதிமன்றத்தில், எடப்பாடி பழனிசாமி ஆஜராக வேண்டும் என்று தெரிவித்துள்ளனர்.
